Bishop Lunas gibati og kaulaw

Way lipod-lipod nga gi-angkon sa bag-ong naordinahan pagka-Obispo nga si Bishop Ronald Bong Lunas, STL, DD nga gibati siya og kaulaw sa iyang pagkapili isip pinakauna nga Obispo gikan sa Diocese of Digos, sumala sa pakighinabi kaniya sa mga tigbalita nga siya sa kasamtangan nahibulong gihapon nganong siya ang napili nga mamahimong Obispo.

Dugang ni Bishop Lunas nga daghan ang adunay katakos nga mamahimong Obispo gikan Diocese sa Digos, gani siya nagsaysay nga ang iyang mga magulang nga pari ang adunay mas katakos ug nakita niya nga angayan sa maong posisyon. “Kaulaw gyud akoang gibati ngano ako ang natungnan, hinoon wala man ta masayod gayod kung unsa ang plano sa Ginoo,” dugang ni Bishop Lunas.

Samtang sigurado usab sumala pa si Bishop Lunas nga dili siya ang katapusan nga mamahimong Obispo gikan sa Diocese sa Digos sumala pa nga siya lamang ang una nga gipili. Mahinumduman nga niadtong Nobyembre 22, 2018 gi-appoint ni Papa Franciso si Bishop Lunas isip Obispo sa Diocese of Pagadian, Zamboanga del Sur ug gi-ordinahan siya niadtong Pebrero 11, 2019 sa Mary Mediatrix Cathedral Digos City, Davao del Sur.