Provincial Director sa Dav Sur PNP mapasalamaton sa tanan atol sa ordinasyon

Gidayeg sa labaw sa Davao del Sur Police Provincial Office nga si Police Senior Supt. Allan Manibog ang tanang nagpaluyo sa Task Force Lunas Inter Agency Security Plan nga nahimong hinungdan nga nagmalampuson ang pagpatuman sa seguridad atol sa Episcopal Ordination ni Bishop Ronald Bong Lunas, STL, DD niadtong Pebrero 11, 2019 sa Mary Mediatrix, Digos City, Davao del Sur.

Mapasalamaton si Manibog sa kapin 500 ka personahe nga gikan sa iyang buhatan, Armed Forces of the Philippines, Bureau of Fire Protection, Police Regional Office XI, Police Regional Office XI Health Services, Explosive Ordinance Division, K9 unit, SWAT, Regional Mobile Force Battalion, Highway Patrol Group, Special Action Force, Provincial Disaster Risk Reduction and Management Council, City Disaster Risk Reduction and Management Office, Red Cross, Traffic Management Center, Philippine Coast Guard, Barangay Tanod sa Barangay Zone II ug Barangay San Jose ning syudad nga nahimong kabahin sa pagpatuman sa kalinaw sa maong okasyon.

Dugang ni Manibog nga walay natala nga dili maayong panghitabo sa maong okasyon ingon man walay kakulisan sa okasyon, diin adunay kapin kon kulang 20 ka mga Obispohan, kapin 200 ka mga Pari ug kapin 3000 nga mga magtutuo nga gikan pa sa nagkadaiyang dapit sa nasod.

Dakong pasalamat usab ni Manibog ngadto sa katawhan nga misunod sa mga patakaran sa maong okasyon. Nahibaloan nga Pebrero 08, 2019 pa lamang gi-deploy na ang tanang sakop sa Task Force Lunas Inter Agency Security Plan, diin lakip sa ilang gihimong lakang, mao ang pagpadala og suwat ngadto sa National Telecommunications Commission kon NTC nga wagtangon ang tanang signal sa nagkadaiyang Telecommunications Company sa Mary Mediatrix Cathedral ug San Isidro Labrador Parish nga adunay 1 kilometer radius ug ang maong plano, hingpit nga napatuman gikan sa alas 2 sa hapon ngadto na sa alas sais sa hapon.