Umaabot nga Obispo, mapasalamaton ug gisalig ang tanan sa Labawng Makagagahom

Dakong pagpasalamat ni Bishop-Elect Ronald “Bong” Lunas sa kaparian sa Diocese sa Digos ingon man kang Bishop Guillermo Afable, DD sa dakong suporta ug mga pagpaningkamot aron andamon ang iyang ordinasyon pagka-Obispo karong umaabot nga Pebrero 11, 2019 sa alas Dos ang takna sa kahaponon sa Mary Mediatrix Cathedral, Digos City, Davao del Sur.

Mapasalamaton sab si Bishop-Elect Lunas ngadto sa tanang mga magtutuong layko nga mihatag og dakong higayon aron sa pagpangandam sa maong okasyon, siya midugang nga nagpadayon sab siya sa pagpangandam sa usa ka espesyal nga hitabo sa iyang kinabuhi, apan ang tanan iya na kining gisalig ngadto sa Labawng Makagagahom alang sa kalampusan sa maong okasyon. “Ambot lang kung aduna ba gyuy ma-andam alang sa maong misyon, sa katapusan Dios lang man ang kalig-on sa mga gitawag, ug siya ang mohatag og giya sa iyang gihatagan og reponsibolidad,” pulong ni Bishop-Elect Lunas.

Samtang miangkon siya nga lahi ra ang iyang pagbati sa iyang ordinasyon kaniadto sa pagka-Deyakono ug pagkapari tali sa umaabot niya nga ordinasyon sa pagka-Obispo, sumala sa iyang eksplenasyon mas gikahinaman niya kaniadto tungod ang pagka-Deyakono ug pagkapari nahimo na kining kabahin sa iyang mga plano diha pa lamang sa pagsulod sa seminaryo, apan ang pagka-Obispo miabot lamang sa iyang kinabuhi nga wala niya damha.

“Akong paningkamotan nga abli ko kanunay sa giya sa Ginoo, siya lang gayud ang magbuot sa tanan kay ang mga Obispo mga instrumento lamang sa Ginoo alang sa dako nga misyon,” dugang ni Bishop-Elect Lunas.

Samtang aminado ang umaaot nga Obispo nga duha ka bulan human siya gipili sa Santo Papa nga mamahimong Obispo sa Diocese of Pagadian, Zamboanga del Sur, wala pa siya makaadto sa lugar, apan wala pa sab sumala pa siya nasayod kung kanus-a siya makabisita sa dapit.