Medical mission gipahigayon sa Manay, DavOr

Sa sayo sa kabuntagon ako nibangon aron mangandam sa paglakaw paadto sa Manay, Davao Oriental. Daghan kong mga pangutana. Kung unsa kaha ang tua sa Manay ug nganong Manay man ang ilang gingalan sa lugar. Pipila ka oras ang byahe padulong sa maong lugar.

Nakahunumdom ko nga 23 anyos na ang nilabay kun kanus-a ko katapusang niadto sa Mati, Davao Oriental, usa sa lungsod duol sa Manay. Ang Mati, pipila pa ka oras ayha muabot sa Manay.

Alas 9 sabuntag sa terminal sa bus kami nakigkita sa uban pang mga kauban sa pag-adto sa Manay. Kini usa ka pamaagi sa pagtubag sa imbitasyon ni Sr. Ma. Marissa Arado, TDM nga sa Marynol School of Manay na giassign.

Gipahibalo mi nga dunay Medical Mission nga pagahimuon. Duol 5 ka oras ang byahe padulong pa lamang sa Mati. Didto kami gisugat ni Sr. Maris. Human niya gikuha ang uban pang mga Medical Professionals nga naghimo pud ug medical mission sa San Isidro, Davao Oriental.

Sapag-abot pa lamang sa Badas, entrada sa Mati, hapit ko malipong, apan tungod sa ka-anindot sa talan-awon, ang kalipong ko nawagtang. Aduna nay daghang kalahian ang Mati sukad sa 23 anyos nakong pagbisita. Hapit ko nalimot nga dili ang Mati ang akong katuyuan kundili ang Manay ang paingnan.

Sapag abot sa bus sa Mati City, niadto mi sa ilang mall aron mukaon ug merienda, samtang nagahulat sa among sundo nga gikan pa sa San Isidro, Davao Oriental.

Nadungagan ang akong mga pangutana. Luyo sa kalipay nga mutabang sa mga tao pina-agi sa Medical Mission sa Marynol School of Manay. Sa hapit na musalop ang adlaw, niabot na si Sr. Maris, uban sa iyang gisundong mga medical professionals.

Nisakay dayon mi sa gihiraman nga sakyanan sa government official sa Manay, tungod kay ang ilahang service naguba maong dili kini pwedeng mudagan. Gabii na sa among pagabot sa Marynol School of Manay. Kundiin ang nisugat kanamo ang “WOW MANAY” kini makit-an sa kilid sa baybayon duol ra sa among katulgan.

Kilid ra sa baybay ang eskwelahan, kun diin madungog nako ang balod sa kadagatan gikan sa Pacific Ocean. Gipapanihapon dayon mi ug namahulay aron sa pagpangandam sa mamahimong medical mission sa sunod adlaw.

Gibahin kami sa duha ka grupo. Gilahi ang mga lalaki sa mga babae. Kauban ko ang ubang mga lalaking medical professionals. Pipila lamang kami nga mga lalake, kun diin tungod sa kakapoy sa byahe maong nakatulog dayon.

Kaadlawon pa lamang akong namatikdan nga medyo alimuot, tungod diay sa brown-out. Naligo ko sa pag-abot sa alas 5:00 aron makatambong sa misa sa alas 6 sa buntag sa St. Francis Xavier Parish Church of Manay.

Malipayong gipalakpakan ang mga volunteer nga mutabang sa Medical Mission sa Marynol of Manay kung diin kini usa sa gihatagan ug bili pinaagi sa pagwelcome sa Kura Paroko.

Lamisa ang nisunod human sa misa. Aron ang lawas mahatagan pud ug kusog. Daghan nga mga Manayon ang nisalmot sa Medical Mission. Sila nipila akong ang ilahang Vital Signs makuha bag-o sila tan-awon sa mga Medical Professionals pinaagisa Medical, tuli, antipara. Nagsugod ang registration ug alas 8:00 sa buntag ug giputol sa alas 2:00 sa hapon. Kun diin kapin 1,000 ka tao ang nakasalmot sa libreng Medical Mission alang sa taga Manay, pinaagi sa Marynol School of Manay.

Sumala pa sa taga Manay nga sa Mati ang nahimong centro dili lamang sa Manay kun dili sa tibuok Davao Oriental. Didto sila nagapangumpra, apil na pud sa pagsuroy.

Dako ang natabang sa Medical Mission labi na sa mga Manayon. Sumala pa sa Police Logistic Officer na si Melvin Cagatan, “dako kaayo ng tabang labi na sa mga katawhan sa Manay. Gusto mi nga mamahimo ning yearly nga advocasia.” Mando pa sa Police Community Relation Officer nga si Normel Alan Mabini, “dako kaayo s’ya ug impact sa mga katawhan labi na sa tamatama lang ang kinabuhi.” “Nakatabang nako ug dako sa pagbasa,” sumala pa ni Lita Bantinoy.

Gipaabot sa Marynol School of Manay ang nahitabong Medical Mission pinaagi sa Social Media. Sumala pa ni Marlyn Macalinao nga “usa ka gasa gikan sa Marynol para sa taga Manay nga ilang gipalanog pinaagi sa Social Media.”

Kining maong Medical Mission ang pagsugod sa 60th Foundation Anniversary sa Marynol School of Manay nga mahitabo sa sunod tuig.

Dako ang nahatag sa “Healers Going forth” nga usa kagrupo sa mga Medical Professionals nga nivoluntaryo sa pagtabang pinaagi sa Medical Missions sa nagkalahilahing lugar. Ang Healers Goingforth gipanguluhan ni Petra Japos, MD.