Kalipay sa kapistahan sa pagsaka ni Maria sa Langit

Gisaulog sa Our Lady of Assumption Quasi Parish, Tagum niadtong Agosto 17, 2019 ang ilang ika-20 ka tuig nga Parochial Fiesta.

Kabahin sa maong aktibidad ang prosesyon sa nagkadaiyang mga imahe sa Santos ug misunod ang pag-ampo.

Ang maong kapistahan gitambongan sa nagkalain-laing miyembro sa mga GKK nga nasakop sa parokya.

Gisugdan ang misa sa alas 9 sa buntag nga gipangulohan ni Bp. Medil Aseo, D.D., Bishop of Tagum, kauban ang mga kaparian sa maong parokya ug mga bag-ong ordina nga mga deacon.

Matud pa ni Bp. Medil sa iyang homiliya, ang Assumption mao ang pagpasaka sa langit ni Maria.

Nanghinaot si Bishop Medil nga kita usab mamahimong sama ni Maria nga modelo sa pagsunod ug pagtuman sa kabubut-on sa Diyos. Ug sama ni Maria malipayon kita sa pagdala kang Kristo sa ubang tao.

Paghuman sa Santos nga misa mao ang pagkompirma sa kapin 50 ka mga kompirmahanan.

Misunod ang agape lunch by district. Ug sa katapusan mao ang presentasyon kada GKK ug parlor games ug aduna usab live band.

Malipayon ang katawhan sa pagselebrar sa maong kapistahan ug miuli sila nga bitbit ang mahinungdanong mensahe sa kaluwasan. (Earnarose Cadungog)