“Mao kini ang atong Bokasyon”

“Mao kini ang atong bokasyon,” miingon si Archbishop Gabriele Caccia, D.D. sa iyang homiliya didto sa kabataan niadtong National Youth Day. Siya naghisgot sa bokasyon sa tanang binunyagan, ilabina sa iyang pag-ingon “kamo ang kahayag sa kalibutan”.

Kita ang kahayag sa kalibutan ilabina alang niadtong nag-antus ug nangandoy nga makasinati sa gugma ug kalinaw. Giawhag kitang tanan nga mahimong andam sa kanunay ug dili gayud kapuyon nga mamahimong instrumento sa paglaum dili lang diha sa atong pamilya kondili alang sa katawhan.

Sa atong pagsaulog sa bulan sa bokasyon, gipahimangnoan ang mga batan-on sa pagpamalandong sa kahimtang sa kalibutan nga nanginahanglan sa kahayag. Kon atong tigumon ug hiusahon ang gagmay nga kahayag sa matag usa, mamahimo kining dakung kalayo nga modilaab aron makadawat ang tanan sa paglaum, gugma ug kinabuhi.

Si Jesus miingon, “Daghan ang anihonon, apan gamay ra ang mangangani.” Ang bulan sa bokasyon, usa sa mga panahon sa pag-ampo nga ang Ginoo sa mangangani magpadala og mga mangangani diha sa iyang parasan. Mag-agni kita sa mga batan-on ngadto sa kinabuhi sa pagka-pari, pagkarelihiyosong babaye (madre) o lalaki (pari o brother). Kitang tanan nakadawat sa gasa sa pagtuo pinaagi usab sa pagsaksi sa daghang mga henerasyon sa mga tumutuo ug sa mga magsasangyaw sa Maayong Balita. Dali tubag na!