Ayaw Kalimot sa Pagpasalamat sa Ginoo

Ika-28 nga Domingo sa Ordinaryong Panahon
2 Kings 5:14-17 / Ps 98:1, 2-3, 3-4 / 2 Tim 2:8-13 / Lk 17:11-19

Dakong katingalahan ang gibuhat ni Hesus diha sa atong Ebanghelyo karon. Si Hesus misulod sa usa ka bario ug dihay napulo ka mga sanglaon ug ni tawag kang Hesus, “Hesus! Magtutudlo! Kaluy-i intawon kami!” kining mga tawhana wala galing kabalo kung kinsa ba gayud si Hesus apan siguro ila nang na dunggan nga si Hesus daghan na ang iyahang gi tambalan ug gi ayo nga mga masakiton apan kung atong susion walay gibuhat si Hesus kanila ug sa tinuod ni walay dala si Hesus nga mga gamit ug mga tambal aron sila tambalan, unsa ang gibuhat ni Hesus kanila? Gi tubag sila ni Hesus ug nisulti kining mga pulonga kanila, “Lakaw ug pahiling kamo sa mga pari” ug nisunod sila sa gi ingon ni Hesus ug diha sa ilang paglakaw ilang namatikdan nga naayo na sila apan ang pangutana unsa bay gi buhat ni Hesus.

Sa kadtong panahuna kung ikaw adunay sakit hilabina kung ikaw usa ka sanglahon sakit nga makatakod ug gi didan usa kana ka tunglo (curse) kay tungod ikaw makasasala. And ilang pagsabot, gi silutan ka sa Ginoo ni anang sakita kay tungod makasasala ka hinungdan nga ang mga tawo gididan ug gisalikway kining mga sanglahon.

Sa atong Ebanghelyo gi hatag ni Hesus ang ilang gipangayo nga kaluoy ug diha namaayo ang mga sanglahon apan adunay gi sugo si Hesus kanila “lakaw ug pagpakita kamo sa mga pari”. Kini aron makita sa pari nga angayan na sila mubalik sa kommunidad. Sa unang panahuna ang mga Pari mao ang mususi kung ang usa ka tawo himsog ug naayo na. Hangtud nianang panahona, sila nahilayo gikan sa hingpit nga pag-apil sa komunidad. Ang pagpadala sa mga sanlahon sa mga pari sa sugo ni Hesus iyang gihatagan sila ug higayon aron sa pagsambit pag-usab sa ilang mga minahal, pagtukod pag-usab sa ilang mga trabaho, ug ipadayon ang normal nga pagsimba.

Matod pa sa panultihon ang atong Ginoo, Ginoo nga muhatag ug ikaduhang higayon (our God is a God of Second Chances) ug kining gi pangayo nila ni Hesus nakatagamtam sila aning higayona. Higayon sa pagbago ug pagbalik sa normal nga kinabuhi. Dako kaayo ang nadawat nila nga gasa sa Ginoo.

Ug diha sa katapusan sa atong Ebanghelyo adunay namatikdan si Hesus, sa napulo nga iyang gi ayo usa lang ang nibalik aron magpasalamat. Simple lang ang hagit kanato karong domingguha kung ikaw tagaan ug grasya angay gayud nga kita mapasalamaton sa grasya nga atong nadawat. Mao lang kini ang hagit ni Hesus kanato ug para kanako kini dili lisod buhaton. Sa tanang grasya nga atong nadawat nato sa tinubuok simanaha isara kaadlaw ang gipangayo sa Ginoo ang pagsimba matag domingo, ang pagsimba usa ka pasalamat. Salit ayaw hakalimti ang pagpasalamat sa tanan grasya nga atong madawat magamay man o dako nga grasya kini angay nga ipasalamat sa Ginoo.

Ang usa ka samaryanhon mao lang ang nibalik kang Hesus ang uban wala na gikalimtan na ang pag pasalamat murag igo ra nidawat sa grasya sa gi ingon INGRATA. Diha sa akong adlaw-adlaw nga kinabuhi dinha sa akong pagmata kanunay ako nga mapasalamaton sa Ginoo tungod kay iya pako gihatagan ug dugang kinabuhi. Dagahan kaayong rason nganu kita angay nga mapasalamaton sa Ginoo busa paghatag ug usa ka yano nga lakang sa pagkamapasalamaton ug nga dili lang nga magtindog ug modawat ug limpyopa, pagsulti ug usa ka pulong sa pagpasalamat sa Ginoo. (Mark Joy Guantero Basallajes, OFM)