Panagtigom sa lumilihok sa BEC (GKK) gihimo sa Davao, kalamboan gilaoman!

Kapin kon kulang 700 ka mga delegado ang misalmot sa 4th BEC National Assembly nga gihimo sa Apo View Hotel, Davao City gikan Nobyembre 11-14, 2019.

Ang tema sa maong panagtigum mao ang “Discernning The Challenges of The BEC Journey in the Light of the New Evangelization” nga gisalmotan sa mga Kaobispohan, Kaparian, Kamadrehan ug mga Layko nga naglihok sa Parokya nga naggikan sa nagkadaiyang Dioceses sa Pilipinas.

Sumala sa atong nahinabi nga si Bishop Jose Cabantan, D.D., Obispo sa Diocese sa Malaybalay nga mao usab ang kasamtangang Catholic Bishops Conference of The Philippines Basic Ecclesial Community In-charge nga ang maong panagtapok mao ang pagpadayag sa grasya nga nadawat gikan sa Labawng Makagagahom, sibo sa kabag-ohan sa simbahan sukad sa Second Vatican Council, diin nahimugso usab ang BEC kon GKK sa DaDiTaMa kon mga lokal nga Simbahan sa Davao, Digos, Tagum ug Mati, diin nasabotan kini niadtong 1971 sa Mindanao Sulu Pastoral Conference nga ipakaylap sa nagkadaiyang Diocese sa Mindanao ug mikaylap pa gayud sa tibuok nasud.

Gilaoman sumala pa ni Bishop Cabantan nga ang maong panagtigum adunay dako nga ikatabang sa matag Gagmay’ng Kristohanong Katilingban kon GKK dili lang dinhi sa Mindanao apan sa tibuok Pilipinas.

Dako gayud nga pagahisgutan ang paglambo sa matag GKK, partikularmente na sa mga kabataan tungod sa panahon nga nagkausab ang kultura ug moderno nga panahon, aron mapadayon ang tahas nga pagpakaylap sa Ebanghelyo.

“Hinaot nga ang Spirito Santo dasigun ang tanan nga mamahimong mainiton ang kasing-kasing sa matag sakop sa BEC (GKK) nga ipadayon ug puy-an ang Ebanghelyo sa Ginoo, padayon nga isangyaw ang balita sugod sa matag Pamilya sa GKK,” dugang sa Obispo.

Samtang sa pikas bahin si Catholic Bishops Conference of the Philippines President ug Davao Archbishop Romulo Valles, D.D. atol sa iyang Homiliya sa Santos nga Misa sa San Pedro Cathedral, Davao City alas singko sa hapon niadtong Nobyembre 11, 2019 isip pag-able sa maong panagtigum, iyang giawhag ang katawhan nga mag-ampo sa Ginoo nga dugangan pa ang pagkamadasigun sa pagtuo sa tanan, sama sa iyang kasinatian sa pagbisita sa apektado sa linog sa Diocese sa Kidapawan kon North Cotabato nga nahimong mipadayag sa pagtuo, diin taliwala sa ilang mga pagsulay nga natagamtaman, nagpabiling madasigun nga migunit sa pagtuo sa Ginoo.