Si Kristo Hari

Ika-34 nga Domingo sa Ordinaryong Panahon
2 Sam 5:1-3 / Ps 122:1-2, 3-4, 4-5 / Col 1:12-20 / Lk 23:35-43

Usa ka higayon niana, adunay usa ka magtutudlo, nagpa-audition kung kinsa ang mamahimong usa ka HARI sa ilang pasundayag nga paggabuhaton. Daghan kaayo sa iyang mga studyante ang mipataas sa ilang mga kamot ug gustong mamahimong Hari. Apan sa pagpasabot na niya nga ang karakter sa Hari sa maong storya, mao man ang biay-biayon, ug patyon, ug mitugyan sa iyang kinabuhi alang sa kaluwasan sa tanan. Human niini, sa pagkahibalo nila, wala nay nagpataas sa ilang kamot ug dili na nila gusto nga mamahimong usa ka Hari.

Karong Dominggoha, atong gisaulog ang Solemnidad nga si Kristo, Hari. Sa atong pagsaulog, atong pangutan-on ang atong kaugalingon, “”unsang matang nga Hari ba ang atong paglantaw sa atong Ginoo? Ang Hari ba nga sama sa paglantaw sa kalibutan? O ang tinuod nga Hari nga gipadayag sa atong Ebnaghelyo karon?

Diha sa Ebanghelyo, adunay tulo ka pundok sa mga tawo, 1.) ang mga tawo nga nagtindog ug nanan-aw, 2.) kadtong duol sa krus, 3.) ug ang duha ka mga criminal tupad ni Kristo.
Karon, atong sayron kung asa man nato itandi o ibutang ang atong kaugalingon samtang ang atong Ginoong Hesu Kristong Hari, nagbitay sa Krus.

Diha ba kita sa unang pundok sa mga tawo nga walay laing gibuhat nga kundi nagtindog ug nagtan-aw lang kung unsay mahitabo, nga walay gisulti, ug wala gani naninguha nga modulo man lamang. Nagpahilayo lang sila. Kung buot huna-hunaon mao pod kining mga tawhana ang miduol kang Hesus nga nangayo ug tabang ug panalangin, apan buot lang nga magpalayo.

O diha ba kita sa ikaduha nga mga pundok sa tawo, pundok sa mga kadagkoan ug pangulo, ug mga sundalo nga nagbiay-biay ug nagbugal-bugal kang Hesus. O usa pod ka ba sa mga nisinggit sa pag-ingon, “Kon ikaw ang hari sa mga Judio luwasa ang imong kaugalingon?”

O diha kaha ana-a ba kita sa ikatulo, ang duha ka makasasala nga haduol tupad sa Ginoo. Ang anaa sa tuo sa atong Ginoo, mao kini ang tawo nga mituo kang Kristo ug midawat sa iyang mga kasal-anan ug mihangyo Kaniya, sa pag-ingon, “Hesus, hinumdomi intawon ako kon maghari kana”.

Ang pangutana karon, ”Asa man nimo itandi ang imong kaugalingon sa tulo ka mga pundok sa mga tawo?” sa unang pundok ba? O kaha sa ikaduha? O sa ikatulo ba? Mga igsuon, ikaw ray makatubag sa maong pangutana. (Rev. Ruperto P. Jamili)