Loboc Concert, handog pasalamat sa Parokya sa Mandug

Coordination meeting. Radio guestings. Pagpamaligya og tickets.

Kini kabahin sa pagpangandam sa organizing committees sa San Alfonso Ma. De Liguori Parish, Mandug, alang sa gikahinamang Loboc Children’s Choir Concert nga mahitabo karong Disyembre 21 ug 22, alas 6:30 sa gabii sa Almendras Gym niining dakbayan.

Tuyo sa Concert nga malingaw ang mga Dabawenyo pinaagi sa mga huni sa pasalamat ug nga sila makatabang sa padayong parish construction sama sa pagpakural, youth apostolate ug survivors sa linog didto sa North Cotabato.

Ang nabilin nga tickets nga nagkantidad og P300, P500, ug P1,000 mamahimong mapalit sa mga parokya dinhi sa Dabaw, sa istasyon sa DXGN ug sa venue mismo.

Alang sa interesadong mo-donate o mo-sponsor sa show, mamahimong bisitahon ang parokya o magbilin og mensahe sa ilang Facebook page ug account (San Alfonso Ma. De Liguori).

Partner sa Parokya mao ang Barangay Mandug Development Council, MV RTC, DXGN 89.9 Spirit FM, ug Davao Catholic Herald.

Ang Loboc Children’s Choir grupo sa mang aawit nga mga bata gikan sa Bohol. World-class performers, sila nituyok sad sa Pilipinas aron tabangan ang ilang mga simbahan sa Bohol nga nalinugan dili pa lang madugay.