Ako ang angay nga bunyagan

The Baptism of the Lord
Is 42:1-4, 6-7 / Ps 29:1-2, 3-4, 9-10 / Acts 10:34-38 / Mt 3:13-17

Unsay rason usahay nganong magpabunyag? Nakadungog na ba kamo nga ang rason usahay kay nagsigeg sakit ang bata, o andam na ang litsosnon, o kay piyesta ma o pasko, o kaha kay niabot ang tiyo o tiya gikan sa abroad?

Walay usa niini ang tukmang rason nganong magpabunyag. Apan ang bunyag ni Kristo mao ang pa inugura sa iyang misyon. Siya miingon nga siya ang angay nga bunyagan, dili tungod kay siya nakasala o kinahanglan mahisakop sa Simbahan. Siya kinahanglang bunyagan aron sa pagmatuod nga kaniya nahumuot ang Dios Amahan sa pagpadala kaniya aron matuman ang iyang plano sa pagluwas sa katawhan. Kini nagpasabot sa iyang pagsugod sa iyang buluhaton sa pagkabig sa tanang binuhat balik ngadto sa Ginoo.

Ang iyang misyon mao ang paglig-on sa atong misyon sa pagbarog alang sa katarong, kaayo ug kamatuoran. Kini ang gihulagway sa Propeta diha sa unang pagbasa. Kita usab nakaambit niining maong misyon sa pagdapig ug pagpanalipod sa maayong plano sa Ginoo. Kita gidasig nga ang Dios nalipay nga kita iyang mga anak ug nga kita angayan nga mosaksi sa iyang maayong plano sa kaluwasan. Ang Dios Amahan mipaambit kanato sa buluhaton nga modala sa atong isigkatawo ngadto sa pagkalig-on aron motunhay ang kaangayan.

Kita maoy gisangunan nga mopadayon sa maayong buhat sa Ginoo. Kita miambit sa pagdihog ni Kristo aron mahatagan kitag gahum aron mopakita sa dakong kalipay ug pagpaubos unsa katinuod nga nahigugma ang Ginoo kanato. Niining maong bunyag nga atong naambitan ni Kristo, kita maantigong moampo, motudlo ug moalagad. Dili lamang ang mga pari, kamadrehan ug relihiyoso maoy nakaambit sa misyon ni Kristo diha sa bunyag, apan lakip ang matag usa kanato, bisan asa, bisan kanus-a, ug bisan maunsa. Kita mga gigasahan sa kahinlo sa kaugalingon ug mohimo sa pag-atiman sa atong mga kaigsuonan aron mapuy-an ang atong kaugalingong bunyag. Sama ni Kristo, kitang tanan angay nga bunyagan.