Kapistahan sa Mahal nga Sto. Niño

Feast of the Sto. Niño: ang labing dako sa gingharian sa langit
Is 9:1-6 / Ps 97:1, 2-3, 3-4, 5-6 / Eph 1:3-6, 15-18 / Mt 18:1-5, 10

Kon pabalikon ka nga mobalik sama sa usa ka bata, mosugot ka? Unsa ba goy naa sa bata nga mao may gigamit ni Hesus sa dihang siya nangutana sa iyang mga tinun-an kon kinsa ang labing dako sa gingharian sa langit? Nganong nagpakatawo man si Hesus ug nahimng us aka bata?

Ang Mahal nga Sto. Nino mao ang batang Hesus. Siya nagpamatuod sa pagpaubos sa Dios aron motipon kanato sa atong pagkahuyang isip tawo. Niining iyang kapistahan, pipila ka mga punto mahimong atong pamalandongan.

Una, ang kinaiya sa usa bata nga dili magpa-importansiya makatabang gayod aron malikayan ang pagpataas. Kon ang matag usa dili lamang unta magpa-importansiy, mas dako ang porsento nga walay panagbingkil. Mao gani nga gipahimangnuan ni Hesus ang iyang mga tinun-an nga magbaton sa kinaiya sama sa usa ka bata. Kay ang bata magpaabot lamang kanus-a siya tagdon sa iyang ginikanan. Diuytay lamang nga pahalipay sama sa kendi, igo na alang kaniya. Ingon usab unta niini ang batasan sa mga magtotoo, moalagad bisan walay balos.

Ikaduha, mahigalaon ang usa ka bata. Ang pagkulang niya sa kasinatian sa kinabuhi dunay maayong ikatampo tungod kay dili pa siya motan-aw sa posibleng dautan nga laraw sa uban. Dili siya magpanuko pagtubag sa tinuoray kanila nga mangutana kaniya. Dili siya magduha-duha sa pagpakighigala sa bisan kinsa nga moduol kaniya kay wala pa man siya’y dili maayong kasinatian kanila. Abli pa siya sa maayong relasyon. Mao nga kini unta, alang kang Kristo, ang batonan sa iyang mga tinun-an.

Ikatulo, tungod kay kulang sila sa gahom ug kusog tungod sa ilang kalinghod, kanunay silang gipanalipdan. Dili lang ang ilang mga ginikanan ug mga magulang kanila ang nanalipod kanila, kondili ang ilang mga anghel sa langit usab. Sa ilang kalumo sa lawas ug sa kahibalo, dunay kanunay naglantaw nga sila dili mahigagom sa pagkabiktima sa dautan. Gipanalipdan sila kanunay. Kini usab unta ang atong bation aron dili kita mahadlok ug mabalaka nga maniguro lamang sa kaugalingon.

Hinaut unta nga ang Batang Hesus manalangin kanato.