Pahinungod sa Batang Hesus: Kaputian nagsaulog sa ika-37 nga kapistahan sa parokya

Dako ang kalipay sa mga parokyano sa Sto. Niño Parish sa Kaputian sa pagsaulog nila sa ilang kapistahan niadtong Enero 19.

Pinaagi sa Santos nga Misa nga gipangulohan ni Msgr. Jaime Gamboa gisaulog sa tibuok parokya ang adlaw sa kapistahan.

Sa iyang homiliya, gisaysay ni Msgr. Gamboa ang kasaysayan sa pagkaylap sa pagtoong Katoliko sa Pilipinas pinaagi sa debosyon sa Sto. Niño 500 ka tuig kaniadto.

Giingon usab niya nga gilantaw nga mamahimong Archdiocesan Shrine ang maong parokya diin adunay replica sa Sto. Niño de Cebu nga dalaon sa parokya ug dawaton kini pinaagi sa fluvial procession gikan sa Davao padulong sa Kaputian.

Gidayeg ni Msgr. Gamboa ang mga kalihukan nga ginahimo sa kasamtangan nga gilantaw nga mahitabo kaniadto sama sa fluvial procession ug street dancing.

Giawhag usab niya ang katawhan nga padayonon ang pagsangpit sa Senyor Sto. Niño sa ilang pag-ampo ug ilang panginahanglan.