Ang Maayong Magbalantay Nag-atiman sa Iyang Mga Karnero

Ikaupat nga Domingo sa Pasko sa Pagkabanhaw (May 3, 2020)
Buhat 2:14, 36-41 / Sal. 23:1-6 / 1 Ped. 2:2-25 / Jn. 10:1-10

Niining panahon sa krisis tungod sa COVID 19, daghan, kung dili man tanan, ang nag-antus sa kabalaka, kahingawa, kahadlok nga dala sa walay kasigurohan ug pagkulang sa kapaninguhaan. Halos nahurot na ang gitagana nga panginahanglan sa matag pamilya tungod kay wala nay makuhaan sa panggastos ang kadagahanan tungod kay wala may trabaho ug magpundo lang man ang katawhan sa balay.

Kini maoy panahon sa pagsalig pag-usab ug sa pagpamalandong nga ang Maayong Magbalantay dili motugot nga kitang iyang panon mamiligro. Si Kristo dili motugot nga biyaan kitang iyang mga karnero nga gutom. Kita angay makaila kaniya nga nagtudlo kanato sa hustong paingnan. Walay mokawat kanato nga mga mapahimuslanon nga katawhan o kahmtang o sakit. Siya ang magpasibsib kanato aron kita mabuhi. Siya motabang kanato nga makadawat og hinabang aron mabuhi.

Gikinahanglan lamang nato nga magpasensiya ug modawat sa sakripisyo sama nga si Kristo nag-antus alang kanato. Tugotan lamang nato nga si Kristo maghimo unta kanato nga sama kaniya nga gisakit, giinsulto, gihukman, kita usab makalahutay human niinng unos nga karon atong giatubang. Kining tanan matapos ra. Dili lamang kita manginsulto. Maglkihay kita sa pagpanghulga ug pagpanimalos. Sama kaniya, pas-anon lamang nato kining maong atong gisagubang kay panalipday niya ang atong kalag.

Puy-an nato ang atong bunyag diin nakadawat kita sa gasa sa Espiritu Santo nga maoy magdala kanato sa paghinulsol sa atong mga pagkulang. Ipalingkawas nato ang atong kaugalingon sa pagka-ut-ot nato tungod sa kalibutanon nga mga buhat. Pahimangnoan nato ang atong kaugalingon isip mga binunyagan, nga gitawag kitang tanan nga mopuyo isip mga anak sa Dios ug dili magpadala lamang niining kalibotana.

Daw wala may kapaingnan kita human niining tanan, mosalig kita sa Maayong Magbalantay. Nahisakop kita sa iyang toril diin kita iyang hatagan sa atong panginahanglan, pakano-on, pahimsugon ug buhion. Ang Maayong Magbalantay mag-atiman kanatong iyang mga karnero.