Kalipay ang gasa sa nabanhawng Ginoo

Third Sunday of Easter (April 26, 2020)
Acts 2:14, 22-28 / Ps 16:1-2, 5, 7-8, 9-10, 11 / 1 Pet 1:17-21 / Lk 24:13-35

Taliwala sa atong nasinati karon nga krisis sa COVID-19, unsaon nato pagmalipayon sa pasko sa pagkabanhaw sa Ginoo? Tinuod ba nga ang iyang pagkabanhaw nagdala kanatog kalipay?

Ang tawong malipayon kanunay mahinumdom. Si San Pedro kinsa nahinumdom nga si Hesus usa ka tawo nga pinadala sa Dios, nga siya bisan gipatay gibanhaw kay gipanalipdan siya kanunay sa Amahan. Sama ni San Pedro, niining panahon sa pagsulay, hinumdoman unta nato ang daghang higayon nga kita giluwas ug gitabangan sa Ginoo.

Ikaduha, ang tawong malipayon malaumon. Sa Salmo kita nagkanayon nga ang Ginoo magpakita kanato sa dalan sa kinabuhi. Taliwala sa kasakit ug kamatayon, ang Dios moayo, molig-on ug maghatag kanatog kinabuhi. Busa, mosalig kita nga dili kita pasagdan sa Ginoo kay dunay mga tawo nga mas nanginahanglan pa kay kanato, apan wala sila pasagdi sa Ginoo. Unsa pa kaha kita?

Ikatulo, ang tawong malipayon adunay pagtahod. Ang kalipay magbunga sa pagtahod kay nasayod man ang tawong malipayon nga siya giatiman kanunay sa Dios nga nagpangga kaniya. Kini atong nadungog sa ikaduhang pagbasa diin giluwas kita dili lamang pinaagi sa bulawan kondili sa bililhong dugo ni Hristo. Tungod niini, angayan nga tahuron nato, ilhon nato ug dawaton nato ang iyang pagkabalaanag Dios. Kining krisis nga atong giatubang karon pahimangno nga tahuron nato ang Ginoo labaw sa tanan.

Ug ikaupat, ang tawong malipayon malaumon. Ang malipayon kanunay nagpaabot sa mga maayong butang taliwala sa dili usahay masabtan ug dili madawat nga mga dautang hitabo. Kini ang nasinati sa duha ka mga tinun-an diha sa Ebanghelyo. Human sila nagpadayag sa ilang kawalay paglaum tungod sa kamatayon ni Hesus, naminaw sila kang Hesus bisan wala sila nakamatikod nga siya diay kadto. Ug gidapit pa gani nila siya nga makig-uban kaniya taliwala sa nagkangitngit na nga kalibotan. Ug diha nila nailhan hinuon nga ang Ginoo man diay kadto nga nakig-uban kanila diha sa pagpikas-pikas sa pan. Kini maoy nakahatag kanilag paglaum nga ipaambit ang maong Maayong Balita nga si Kristo buhi diay uban kanila. Busa paglipay kay nabanhaw na siya!