Tabang alang Covid-19

Ang lokal nga Simbahan sa Dabaw nag-organisa og kalihukan alang sa mga katawhan nga hilabihang naapektuhan sa Covid-19 pandemic.

Pinaagi sa pagpangulo sa Archdiocesan Social Action Center (ASAC) Davao, gihimo ang Operation Tabang COVID (Care for Our Vulnerable Indigents in Davao) isip tabang sa apektado sa maong pandemic.

Kini pagahimoon sulod sa duha hangtud lima ka bulan aron tabangan ang mga ‘poorest of the poor’ nga mga katawhan nga nahisakop sa Archdiocese of Davao.

Kabahin sa maong lihuk ang mga parokya sa Dabaw nga ipadagan sa nagkalain-laing Gagmay’ng Kristohanong Katilingban (GKK) diin kabahin ang mga giila nga indigents.

Himoon ang pag-apud-apud sa mga natigom ug gi-repack nga mga food items sa gi-ila nga mga benepisyaryo ug dili kini uban sa pag-alayon sa paghatag sa ahensya sa gobyerno aron dili magdoble ang madawat.

Ipatuman usab ang no mass gathering system diin mamahimong kuhaon sa benepisyaryo ang items sa parokya o kon dili, ihatud kini sa mga GKK Servant Leaders.

Gi-awhag usab ang uban nga motabang pinaagi sa ilang donasyon in cash o in kind alang sa mga hilabihang naapektuhan sa ilang panginabuhi niining panahon sa paglikay sa pagkaylap sa Coronavirus. Ang mga food items mamahimong dalhon sa San Pablo Parish sa Juna Subdivision, diin nahimutang ang sentro sa pagdawat pinaagi sa ASAC.