Adlaw sa Kalibotanong Komunikasyon

7th Sunday of Easter (May 24, 2020)
Acts 1:12-14 / Ps 27:1, 4, 7-8 / 1 Peter 4:13-16 / Jn 17:1-11

“Makauulaw kaayo kung ang mga Katoliko walay gihimo ug motugot lamang nga ang Pulong sa Ginoo mahilom o mabalda tungod sa mga kalisod nga teknikal ug kamahal niining kasamtangang midya.”

Kini giduso sa Dekreto sa Katilingbanong Komunikasyon sa Vatikano Dos. Karong adlawa, sa atong pagsaulog sa Adlaw sa Kalibotanong Komunikasyon, si Kristo nagpadala pag-usab kanato isip mga magtotoo nga mosugid sa estorya ni Kristo nga nagakahitabo karon sa atong palibot. Siya nagpadala kanato, sama sa gisulti ni Santo Papa Francisco sa iyang mensahe niining maong kasaulogan nga ang Pulong nga mao si Kristo mao ang estorya mismo.

Niining panahon sa krisis, mas maila nato si Kristo, ang himaya sa Amahan ug ang kaalam sa Espiritu Santo nga maoy maghatag kanato sa paglaum sa kasinatian sa kangitngit. Masinati nato ang pagka-ania sa Dios karon kinsa nabanhaw ug maoy labaw sa tanan niining kalibotan ug sa sunod.

Mosalig kita sa Espiritu Santo taliwala sa pagkulang nato sa pagsabot sa mga panghitabo sa palibot. Molaum kita nga pinaagi sa lamdag ug kadasig sa Espiritu Santo dinhi kanato, kita mahimong tinuod nga mga saksi ni Kristo diha sa atong mga pulong makahupay, mga buhat sa pagtabang, mga pag-ampo nga kinasing-kasing ug mga huna-huna nga hinlo. Magpaabot unta kita sa pagbalik ni Hesus nga puno sa kakugi sa pagpaila nga siya ania uban kanato, kasakit man o kalipay, kalampusan man o kapakyasan, kangitngit man ug kahayag.

Gamiton nato ang mga hitsas sa modernong komunikasyon aron malig-on ang matag usa ug dili aron motintal. Pahimuslan ta ang kasamtangang midya, labina sa internet o social midya nga makapadasig sa pagtoo nga mapuy-an sa atong inadlaw-adlaw nga kinabuhi. Bisan pag dunay social distancing, mabati unta nato ang kaduol ug kasuod sa usa’g usa pinaagi sa pasuporta sa mga programa sa social media, radyo, telebisyon ug uban pa nga nakapalig-on kanato. “Makauulaw kaayo kung ang mga Katoliko walay gihimo ug motugot lamang nga ang Pulong sa Ginoo mahilom o mabalda tungod sa mga kalisod nga teknikal ug kamahal niining kasamtangang midya.”