Ayaw kaguol, salig sa Dios

Ikalima nga Domingo sa Pagkabanhaw (May 10, 2020)
Buhat 6:1-7 / Sal. 133:1-2, 4-5 / 1 Ped. 2:4-9 / Jn. 14:1-12

Daghang mga nahitaboan kanato karong mga panahona mibati sa tumang kaguol tungod kay ang kamatayon sa ilang mga mahal sa kinabuhi, dili malamayan sa daghang paryente ug kaila. Ang uban gani kanila dili gayod makatambong sa lamay ug lubong tungod sa ECQ. Makasubo nga bation nga ang mga biktima sa COVID 19 nga nangamatay dili gani mabisitahan sa ilang mga mahal samtang naa pa sa ospital.

Karong Dominggoha, si Kristo nga nabanhaw naglig-on kanato nga taliwala sa daghang kasubo dili kita mamuhi sa pagsalig kaniya. Siya nga miagi usab sa kasubo sa pagkasinalikway, mipasalig kanato nga molaum lamang kanunay ug motuo sa Dios. Siya nga nakasinati usab sa atong kasubo samtang buhi pa siya, miawahag kanato nga mosalig lamang sa Amahan kay siya nag-andam og dapit sa matag usa kanato.

Sama sa unang pagbasa, ang Ginoo magpili gayod og mga tawo nga moatiman kanato. Pinaagi sa mahigugmaong paghatag kanato sa atong gikinahanglan, ang Dios magpadala og instrumento diha sa Simbahan aron maatiman ang atong pagkulang. Kini maoy makapalig-on unta kanato niining panahon sa kasub-anan. Ang atong pang-gobyerno naningkamot usab nga matubag ang atong pangabuhian panahon niining krisis nga atong giatubang. Busa maningkamot kitang magmalig-on subay sa pagtoo nga ang Dios ania nakig-uban sa atong mga kasubo.

Kung nabati man nato nga kita daw gisalikway, hinumdoman nato, nga sama sa gisaysay sa ikaduhang pagbasa, ang atong Manluluwas usab nakasinati niini. Dili kita mao ray naglisod. Dili kita ra maoy nasakit. Nag-una na kanato si Kristo nga nabanhaw. Ang iyang pagkabanhaw maoy atong pasalig nga dili kita magpabilin as kalisod ug kasubo. Makabangon kita gikan sa kangitngit ug mosanag ang atong pagpuyo. Madugta man ug mopahulay ang atong gipuy-an dinhi karon niining kalibotanan, apan giandaman kita sa Manluluwas og pinuy-anan ug lawas nga walay nay pagkatapos didto uban kaniya sa langit. Busa ayaw kaguol, salig lang sa Dios.