Dawata ang gasa sa Espiritu Santo

Pentecost Sunday (May 31, 2020)
Acts 2:1-11 / Ps 104:1, 24, 29-30, 31, 34 / 1 Cor 12:3-7, 12-13 / Jn 20:19-23

Ang COVID 19 nga pandemia walay gipili. Lukop kini sa kalibotan. Hamtong man o bata, adunahan man o kabos, posibleng iyang mabiktima.

Ang pagkabanhaw ni Kristo walay puy gipili. Matarong ka man o dautan, puti ka man o itom, edukado ka man o dili, ikaw iyang gipakamatyan. Ang iyang mga bunga sa pagluwas padayon nga walay gipili hangtod karon. Sa dagway sa Espiritu Santo ang Ginoo nagpaila sa tanan bisan taga asa kita. Sama sa unang pagbasa ang kaayo sa Ginoo mapakita sa mga tawong maatimanon taliwala sa krisis karon. Mahimo kitang magkasinabot tungod kay pareho kitag hagit nga giatubang. Mao nga makaamgo unta kita nga usa lamang kita ka lawas, us aka pamilya sa katawhan sa tibuok kalibotan, usa ang gigikanan ug usa ang padulngan.

Kung makaamgo kita nga usa ra kita isip katawhan sa tibuok kalibotan, mapuy-an gayod nato ang kalinaw nga gihatag ni Kristo kanato. Kung maamgohan lamang nato nga ang Espiritu Santo gigasa dili lang sa mga magtotoo apan sa tanan tawo, makabati kita sa panginahanglan sa respero sa matag usa. Atong malantawan nga bisan kinsa kita nanginahanglan ug makaapekto sa matag usa. Kini ang nasinati nato panahon niining krisis sa COVID 19. Walay usa kanato nga nag-inusara. Ang matag usa konektado sa usag usa. Busa mapaambit nato ang kalinaw kung madiskubrehan nato pag-usab nga ang Espritu Santo anaa sa matag usa kanato.

Ang Espiritu Santo maoy makapahiusa kanatong tanan. Nagtugot kini sa panaglahi ug modawat nga gamiton kining panaglahi aron makatabang unsay wala sa uban. Siya ang magdala kanatog kabag-ohan. Nagapukaw kini sa atong mga pagkulang ug nagpabangon sa atong kalig-on. Siya ang maglamdag kanunay sa atong mga dalan. Sa panahon sa kangitngit iya kitang hayagan. Busa palihukon ta ang mga gasa sa Espiritu Santo. Dawaton ta pag-usab siya.