Ayaw kahadlok

Twelfth Sunday in Ordinary Time (June 21, 2020)
Jer 20:10-13 / Ps 69:8-10, 14, 17, 33-35 / Rom 5:12-15 / Matt 10:26-33

Tungod sa nasinati nato karon nga krisis sa COVID 19, daghan ang mibati sa kahadlok uban sa kabalaka ug kaguol. Tungod kay daghan ang mihinay nga negosyo, nawad-an og kapaniguhaan, naundang sa trabaho ug walay kapadulngan, daghan ang nabalaka, nasubo ug nahadlok kon makalahutay pa ba.

Ang atong mga pagbasa, labina sa unang pagbasa nagsaysay nianang susamang kahadlok, kasubo ug kabalaka sa usa ka propeta sa Dios nga gisalikway sa mga tawo. Nagsaysay kini sa usa ka kahadlok sa usa ka matinud-anong alagad sa Dios nga gihulga ug namiligro sa kamatayon. Apan ang Dios mohatag og pagsulay sa tawo nga dunay pagtoo ug pagsalig. Mag-awit sa Dios ang mosalig kaniya kay moluwas ang Dios sa kabos ug mopahamtang sa iyang gahum ngadto sa dautan.

Sa Salmo kita naglaum sa Dios nga motubag kanato sa atong pagsangpit kaniya. Ang Dios nga motubag kanato sa atong pagsangpit, diha sa ikaduhang pagbasa nagluwas kanato pinaagi ni Hesukristo, ang tuburan sa grasya. Taliwala sa atong mga sala, ang Ginoo mipapas niini pinaagi sa pag-ula sa iyang dugo. Kining iyang grasya sa pasaylo nagaawas kanunay pinaagi sa iyang pag-uban ug pag-atiman kanato taliwala sa mga katalagman.

Mao nga sa Ebanghelyo, giingnan kita ni Hesus nga dili mahadlok kay walay tinaguan nga dili mabutyag, walay kangitngit nga dili mahayagan, walay makapatay sa kalag, walay gipasagdan sa Ginoo bisan gani ang mga langgam. Kon ang ubang gagmay’ng binuhat sa Dios iyang giatiman, unsa pa kaha kitang tawo nga gipangga niya pag-ayo? Kon gihatagan sa Dios ang mga tanom, mga langgam ug ubang binuhat sa ilang panginahanglan, kita pa kaha nga maoy iyang hulagway?

Busa kon nahadlok ka man, hinumdomi nga ang Dios motugot sa mga kalisod, kangitngit ug mga hugla, apan dili siya mobiya kanato. Siya modan-ag ug magpanaw uban kanato. Buhata lamang ang maayo kutob sa imong mahimo kay ang Dios maglig-on, magpakaon ug manalangin kanimo. Ayaw kahadlok!