Chrism Mass ug ang Pagbag-o sa Panaad sa Kaparian sa Diyosesis sa Mati

Gipahigayon sa Diyosesis sa Mati ang Chrism Mass ug ang pagbag-o sa panaad sa mga kaparian sa San Nicolas de Tolentino Cathedral. Ang maong kasaulogan gipangunahan mismo sa obispo sa Mati, Most Rev. Abel C. Apigo, D.D. Nakigduyog usab kaniya ang Obispo Emerito, Patricio H. Alo, D.D., mga kaparian ug mga relihiyoso.

Sagad pagahimuon ang Chrism Mass sa Huwebes sa buntag panahon sa Semana Santa apan kay gipailawom man ubos sa General Community Quarantine (GCQ) ang tibuok probinsiya tungod sa COVID-19, ang tanan nga panagtapok na-kansela. Ug tungod sa kaluoy sa Dios, ang probinsya sa Davao Oriental anaa na karon sa Modified General Community Quarantine (MGCQ) nga sitwasyon mao nga gipahigayon dayon kining usa ka importante nga kasaulogan sa simbahan.

Sa iyang homiliya, si Obispo Apigo nagpahinumdom ngadto sa mga kaparian sa Mati nga mobag-o sa ilang panaad sa pagka-pari. Siya nagkanayon: “Diha sa adlaw sa inyong ordinasyon, gidihugan ang inyong mga palad sa krisma aron magbalaan usab sa katawhan sa Diyos. Nga pinaagi niini nalig-on gayud ang katawhan sa Diyos ug milambo ang ilang pagtuo. Pinaagi usab niini, ang mga katawhan nagiyahan paduol ngadto sa Diyos.” Iyang gidugang nga kini angayan nga hinumduman ug hatagan ug bili sa mga kaparian kay kini gasa man sa Dios ngadto kanila diha sa ilang pagtubag sa tawag sa pagka-pari.

Gihatagan usab niya ug pagtimbaya ang mga nagsaulog sa ika-25 ka tuig nga kasumaran sa ilang pagkapari. Dako ang iyang pasalamat ngadto kang Reb. Padre Ricardo Siblos, ang kasamtangang rector sa San Nicolas de Tolentino Cathedral, Reb. Padre Albert Silagan, ang kura paroko sa parokya sa Nuestra Señora de Guia, sa Dawan, Reb. Padre Joel Vidal, kura paroko sa parokya sa San Isidro Labrador, Bato-bato ug Reb. Padre Dennis Alingalan.

Ang mga lana nga gipanalanginan sulod sa misa mao ang lana sa masakiton, lana sa balaang krisma ug ang lana alang niadtong nangandam nga mudawat sa bunyag. Kini nagpahinumdom nga giatiman gayud sa simbahan ang katawhan sa Diyos gikan sa pagdawat sa bunyag, sa kumpirmasyon ug hangtod sa higayon nga ang tawo masakit.

Sa katapusan, gihangyo usab sa obispo ang katawhan nga iampo ang mga kaparian aron madawat nila ang panalangin sa Diyos aron mamahimo silang maayong alagad sa katawhan sa Diyos. (Elmarie Medilo | SocCom of San Nicolas De Tolentino Cathedral, Mati)