Unsa ang Fil-Mission Sunday?

Usa ka mahinungdanong adlaw ang katapusang Dominggo sa Hulyo diin gisaulog sa tibuok Katolikong Simbahan sa Pilipinas ang Fil-Mission Sunday. Apan unsa man kining maong pagsaulog ug unsa man ang tumong niini?

Gisangonan ni Kristo ang iyang mga tinun-an ug usa ka misyon. Unsa man kining misyon? Ato kanang makita diha sa ebanghelyo sumala ni San Mateo (28: 19-20) “Himoa silang akong mga tinun-an sa tanang mga nasud, bunyagi sila sa ngalan sa Amahan, sa Anak ug sa Espiritu Santo. Tudloi sila pagtuman sa tanan nakong gisugo kaninyo.” Isip mga binunyagan, nahimo kitang mga sumusunod ni Kristo ug sa ingon nakaambit kita sa tahas sa pagsangyaw sa gingharian sa Ginoo.

Ang Fil-Mission Sunday mao ang lokal nga pagsulog sa gasa sa misyon. Kini usa ka higayon sa pagpasalamat sa Ginoo sa tanang misyonerong Pilipino sa mga langyawng dapit nga mitahan sa ilang kinabuhi tungod ug alang sa Ebanghelyo. Lahi kini sa World Mission Sunday nga saulogon matag ikatulong Dominggo sa Oktobre. Ang tumong niining maong pagsaulog mao ang pagpukaw sa kaamguhan sa mga Katolikong Pilipino sa ilang bokasyon sa pagkamisyonero. Pinaagi niining pagsaulog ang mga Katolikong Pilipino gitawag nga mahimong kabahin niining dakong tahas sa pagpakaylap sa gingharian sa Ginoo. “Ang tibuok Simbahan misyonero ug ang misyon sa pagsangyaw katungdanan sa katawhan sa Diyos.” (Ad Gentes # 35). Isip kabahin nining misyon, ang matag binunyagan giawhag sa pag-ampo alang sa mga misyonerong Pilipino nga milangyaw sa ubang mga nasud aron sa pagpalapnag sa Ebanghelyo. Gidapit usab ang matag magtutuo nga mutabang pinaagi’g materyal nga suporta alang sa mga misyonero.

Ang misyon kinabuhi sa Simbahan. Nagasukad sa Diyos ug gigasa sa katawhan. Usa kini ka tahas sa paghigugma ug pagpaambit aron diha sa Diyos kita magmahingpit. Niining pagsaulog sa Fil-Mission Sunday, gihagit kita nga mutampo ug mulambigit sa misyon sa simbahan. Ato untang mapuy-an ang matuod nga diwa sa pagkamisyonero diha sa atong pagkamanggihatagon. Dili tiaw ang gisagubang nga mga pagsuway sa atong mga misyonerong Pilipino. Ato silang buligan sa atong mga pag-ampo ug tabangan ta sila sa bisan unsang paagi sa pagtampo alang sa mapadayonong pagpakaylap sa Ebanghelyo. (Jerick Asdang)