Pagdapit sa Rosaryo gipadayon sa Diosesis sa Digos

Panahon niining pandemya ang Diosesis sa Digos nagdapit sa tanan sa pagsalmot sa pag-ampo sa Santos nga Rosaryo matag alas 8:00 sa gabii.

Ang maong pagdapit nagkanayon: AN INVITATION, A MISSION. We Pray as one. We Heal as one. We Renew as one. Tanang pari, religious, seminarians, tanang Katolikong pamilya.

Sa pahayag ni Bishop Guillermo Afable, D.D. nga makita ug madungog sa official facebook page sa Diocese, ang SUGID: Diocese of Digos, siya nagkanayon nga, “kinahanglan natong ipadayo ang pag-ampo sa rosaryo sa Mahal nga Birhen Maria, sa pagsangpit sa mga Santos aron makaabot ang atong pag-ampo ngadto sa Santissima Trinidad.”

Gisaysay ni Bishop Afable ang kaimportansiya sa pagsangpit alang sa panabang sa mga balaan nga atua na sa langit samtang kita ania pa naglawig dinhi sa yuta. Sa atong kahuyang, nanginahanglan kita sa kalig-on pinaagi sa pag-ampo ug atong mga debosyon, labina sa Mahal natong Inahang, ang Birhen Maria.

Uban sa dakong paglaum nga kita maluwas niining peligro atubangan sa sakit nga COVID 19, ang maong pag-awhag gipakusgan sa Diocese. Tanan, bata o hamtong, lalaki ug babaye nga mga magtotoo giawhag sa pag-apil niini matag gabii kay walay imposible alang sa Ginoo kung kita mosangpit lamang kaniya.