Gasa sa Misyon sa Dayosises sa Digos ug Tagum

Gasahan na usab ang mga simbahan sa Dayosises sa Tagum ug Digos sa bag-ong lima ka mga pari.

Gitakdang pagapandongan sa mga kamot sa ilang Obispo sa pagdawat sa Sakramento sa pagka-pari ang usa ka Diakono gikan sa Dayosis sa Digos niadtong Mayo 13, 2021 ug laing upat gikan sa Dayosis sa Tagum karong bulan sa Hunyo.

Si Reberendo Billy Lee P. Ulan-Ulan midawat sa Sakramento sa pagka-pari pinaagi sa pagpandong sa mga kamot ni Most Rev. Guillermo D. Afable, D.D. sulod sa Mary Mediatrix Cathedral, Digos City, Davao del Sur.

Sa samang higayon, usa ka sulat pastoral nga gipagawas ni Most Rev. Medil Aseo, nagpahibalo sa tanan nga dunay upat ka mga kandidato sa pagka-pari nga paga-ordinahan sa bulan sa Hunyo.

Si Reb. Michael John Cabel Segura, natawo sa May 2, 1994, sakop sa parokya sa Nuestra Señora del Pilar Quasi-Parish Brgy. Babag Davao de Oro, diin gitakdang paga-ordinahan sa June 8 2021 sa alas-9 sa buntag.

Nagtungha siya sa Elementarya sa Monkayo Central Elementary School; High school: Monkayo National High School; College: Queen of Apostles College Seminary ug Theology: St. Francis Xavier Regional Major Seminary.

Ikaduha mao si Reb. Jason Abryl Escote kinsa gitakdang paga-ordinahan sa June 15 2021 sa alas-9 sa buntag sa iyang parokya sa St. Therese of the Child Jesus, Nabunturan Davao de Oro. Natawo siya sa Abril 21, 1993, nagtungha sa Elementarya sa Nabunturan Central Elementary School; High school sa Assumption College of Nabunturan ; kolehiyo sa Queen of Apostles College Seminary; ug Theology sa St.John the Evangelist School of Theology.

Ikatulo mao si Reb. Erodito Capoy Escol Jr. , natawo June 4, 1991 nga taga San Isidro Labrador Parish, Kapalong, Davao del Norte. Nagtungha sa Elementarya sa Maniki Central Elementary School; High School sa Kapalong National High School; College sa Queen of Apostles College Seminary; ug Theology sa Seminario Mayor de San Carlos. Gitakdang paga-ordinahan siya sa Hunyo 22, 2021 sa alas-9 sa buntag sa iyang parokya.

Ug si Rev. Alfredo Elnar Jr. gitakdang paga-ordinahan sa June 29 2021 sa alas-2 sa hapon sa pm sa Parish of Christ the Eucharistic King, Tagum City, Davao del Norte. Natawo niadtong Hunyo 23, 1992, nagtungha siya sa Elementarya ug High School sa St. Mary’s College of Tagum samtang sa kolehiyo, sa Queen of Apostles College Seminary ug Theology sa St. Francis Xavier Regional Major Seminary.

Gi-awhag sa chancellor nga si Padre Vince Arado, nga kinsa kadtong dunay impormasyon nga makababag sa ilang ordinasyon, mamahimong mosulat ngadto sa kura paroko diin nahisakop ang kandidato o sa chancellor nga inubanan sa mga dokumento nga makasuporta sa reklamo.

Gihangyo usab angtanan sa pag-ampo alang sa upat ka mga kandidato samtang nangandam sila sa ilang ordinasyon sa SACRED ORDER OF PRIESTS.