Personal nga Pagbag-o tahas Misyon

Andam na ang Parokya sa Ascension of the Lord (ALP) sa Matina nga saulogon ang ika -20 nga Kapistahan sa Mayo 16, 2021 sa tema nga “PAGSAKA SA LANGIT SA GINOO, TAHAS MISYON SA MGA TINUN-AN; IPAAMBIT SA PINIYALANG KATILINGBAN.”

Sa mensahe nga gipadangat alang sa tanang mga GKK Servant Leaders, Parish Pastoral Team, Parish Pastoral Coordinating Committee, Parish Recognized Center Organizations, Mass Sponsors, ug tanang mga ALP Stewards ug mga Parokyano, gipamahayag ni Reb. Padre Zenon B. Ampong, ang kura paroko sa ALP ug Reb. Padre Edsel Paloma, iyang luyo-luyo, gipadayag nila ang dakong pasalamat sa pagka-manggihatagon diha ug pinaagi sa aktibo nga ministriya ug nagkalainglaing apostolado, ilabi na sa tanang manggihatagong suporta sa parokya sa milabay nga katuigan.

Matud ni Padre Ampong, ang Pagsaka sa Nabanhaw nga Diyos nagdala ug bag-ong moda sa Iyang presensiya ngadto sa Iyang mga disipulo ug sa tanan diha sa Simbahan kinsa karon nasasinati sa Iyang presensiya dili sa pisikal apan pinaagi sa Iyang mga pulong, diha sa mga sakramento, sa panagway sa mga kaigsoonan, ug sa nagkalainlaing panghitabo sa kinabuhi.

Usa ka saad ang iyang gihatag ngadto sa Iyang mga disipulo (Buhat 1:8-9) nga ipadala ang Balaang Espiritu kinsa gihulagway sa Buhat 2:1-4; ug naamgohan ug padayon nga maamgohan.

Midugang si Padre Ampong nga isip mga binunyagan, naambitan sa tanan ang Misyon ni Kristo diha sa Simbahan (JP II Christi Fidelis Laici Ho. 12/ CCC 1267).

Busa, sa gi-anunsyo nga tema ning tuiga, si Padre Ampong nagkanayon nga mao kini usa ka pamaagi sa pagpadayag sa pag-ampo nga mamahimong hingpit nga masinati ang usa ka personal nga kabag-ohan ug sa pagkahimo nga mga pinadala sa kabag-ohan pinaagi sa Misyon isip mga PINIYALAN.

Gidawat ug gipuy-an kini karon sa mga parokyano sa ALP pinaagi sa mga buhat sa kaluoy ug sa pagka-mamugnaon aron nga padayong mapalapnag ang Maayong Balita inubanan sa pagmatngon ug pagsunod sa mga health protocols batok sa coronavirus.

Isip pagpasalamat sa parokya, pagahimoon ang duha ka hugna ALP COMMUNITY BAPTISM (10:00 sa buntag ug alas 3:00 sa hapon) alang sa kabataan nga nag-edad “0” hangtod 11 anyos sa Mayo 12, sa paghandom sa katukuran kon Founding Anniversary sa parokya.

Subay sa kasinatian sa kasaulogan sa Tuig sa Kabatan-onan sa tuig 2019, diin gihimo ang panaw-duaw sa Krus sa Kabatan-onan (Youth Cross), himoon usab ang panaw duaw sa imahe sa Ascension of the Lord sa tanang mga zona gikan zona 1 hangtod zona 10 sugod Mayo 7 kutob Mayo 15, 2021. Sa matag gipili nga kapilya sa zona, pagahimoon ang Novena Mass ug dawat-dawaton sa sa matag zona hangtod nga maabot sa katapusang zona. Sa alas -4 sa hapon sa Mayo 15, Iprosesyon (sakay sa trisikad) ang mga imahe sa tanang 35 ka mga kapilya ubos sa ALP palibot sa simbahan diin pagahimoon ang Santos nga Misa.

Inubanan sa dakong pasalamat, saulogon sa tibuok adlaw sa Mayo 16, adlaw sa kapistahan sa ALP ang mga Santos nga Misa gikan sa alas 5:30 sa buntag nga pagapanguluhan ni Reb. P. Ampong. Human sa unang Misa, pagahimoon ang GROUNDBREAKING CEREMONY alang sa katukuran sa dakong proyekto nga ALP MULTIPURPOSE BUILDING sa luyo nga bahin sa simbahan. I livestream kini sa DXGN 89.9 Spirit FM facebook page ug isibya sa DXGN 89.9 Spirit FM radio sumpay sa alas 8:00 sa buntag nga Pontifical Mass ni CBCP President Davao Archbishop Romulo G. Valles, D.D.

Ikaduhang misa sa alas 7:00 sa buntag, pagapanguluhan ni kanhi kura paroko nga si Reb. Padre Leonardo A. Dublan, Jr. , kura paroko karon sa St. Joseph the Worker Parish, Sasa.

Inigkahuman sa alas-12 sa udto nga Santos nga Misa, saulogon ONLINE sa SOCIAL MEDIA ang FIESTA SA NAYON nga pagpanguluhan sa kabatan-onan sa ALP, pinaagi sa fb page: https://www.facebook.com/ascensionofthelordparishsoccom diin masaksihan ang raffle draw ug variety show ug deklarasyon sa mga mananaog sa mga online contest sa TIKTOK, photo contest sa pamilya, ug uban pa.

Busa sa katapusan, gi-aghat ni Padre Ampong ang tanan nga pangayoon ang giya sa Nabanhaw nga Diyos pinaagi sa Espiritu Santo nga himoon kitang tanan nga responsable nga mga piniyalan.