Ang Medalyang Bulawan

Pangandoy ni Hidilyn Diaz nga makaangkon og Gold Medal sa Olympics. Ug, tuod man, pinaagi sa grasya sa Diyos ug diha sa iyang kaugalingong mga paningkamot, inubanan sa tabang sa iyang mga coaches, ubang mga trainers ug mga sponsors, natuman ang iyang pangandoy. Niining miaging Hulyo 26, 2021, sa kategoriya alang sa Kababayen-an nga gatimbang og 55-kilograms, midaug siya. Diha sa iyang pag-alsa sa pabug-at nga 127 kilos, iyang nasakmit ang iyang gipangandoy nga Medalyang Bulawan.

Tungod sa iyang kalampusan, sa unang higayon sa kasaysayan sa Olympics, gipatugtog ang nasudnong awit sa Pilipinas, ang Lupang Hinirang. Ug tungod sa iyang pagdaug, nakaangkon usab ang atong pinaggang nasud sa iyang pinaka-unang gold medal sa Olympics. Ug tungod sa iyang talagsaong pagkab-ot sa medalyang bulawan, daghan kanato ang nakalukso o, dili ba kaha, nakahilak sa kalipay.

Busa, niining kadaugan ni Hidilyn sa Japan Olympics 2020, maayong mamalandong mahitungod sa atong tagsa-tagsa ka mga pangandoy. O mga pangandoy sa ubang mga nilalang dinhi sa atong kalibutan.

Unsa kaha ang pangandoy sa bulak? Siguro, kun ako ang bulak (pasensiya na bulak kun akong hatagan og kaugalingong interpretasyon ang imong kinabuhi), siguro mangandoy ako nga makutlo gikan sa sanga aron matanyag sa usa sa maanyag nga dalaga, o mahalad sa atubangan sa larawan sa Mahal nga Birhen, o mapahimutang sa atubangan sa lungon o panteyon sa usa ka mahal sa kinabuhi.

Sakit kaayo ang makutlo sa sanga. Tinuod. Kay nagkahulugan kini sa umaabot nga kamatayon isip matahom o mahumot nga bulak. Apan siguro, mas sakit alang sa bulak nga malaya unya malata na lamang dayon nga walay ni usa ka tawo o hayop ang nakabantay.

Unsa kaha ang pangandoy sa baboy? Siguro, kun ako ang baboy (Baboy, pasensiya na kun akong hatagan og kaugalingong interpretasyon ang imong kinabuhi), akong dakong pangandoy nga ma-lechon kay kinaham man gayud sa tanan ang lechon.

Tinuod, dili lalim ang kasakit nga masinati sa baboy kun siya paga-litsonon. Unang dunggab pa lang daan diha sa pagluba kaniya, kusog na kaayo ang iyang tiyabaw hangtud nga mabugtuan siya og ginhawa ug kinabuhi.

Apan labing alaot tingali ang baboy nga, sa iyang pagkababoy, wala man lamang mahimong porkchop, apritada, humba, barbecue o hamonada.

Busa, bulahan gayud diay ang baboy nga gi-lechon; alaot sa tanang alaot ang baboy nga wala man lamang gi-chicharon.

Diha diay sa atong mga paningkamot nga makab-ot ang atong pangandoy anaa ang kamatayon – kamatayon sa kaugalingon. Kang Hidilyn, disiplina. Buot ipasabot, kamatayon sa mga kalingawan nga molayo kaniya sa iyang tumong nga medalyang bulawan. Sa bulak, sa baboy, ug sa ubang mga nilalang sa kalibutan, kamatayon makahatag og kalipay o kinabuhi sa uban.

Pangandoy ni Jesus nga iyang matuman ang kabubut-on sa Amahan dinhi sa kalibutan. Busa nagtudlo siya, miayo og mga masakiton, apan didto sa Halamanan sa Gethsemane, nakaagulo siya sa tumang kahadlok, “My Father, if it is possible, let this cup pass from me; yet, not as I will, but as you will.”

Sa katapusan, gitugyan ni Jesus ang iyang kinabuhi aron, sibo sa kabubut-on sa mapinanggaong Amahan, ikaw ug ako maluwas sa kangitngit ug sala.

Karon, andam ba usab akong mamatay sa kaugalingon aron akong matuman ang akong pangandoy, ang pangandoy sa Ginoo alang kanako? (Raynar Echano)