Eleksyon gipangandaman pinaagi sa Political Education sa mga Soccom

Dako ug gikatabang ngadto sa mga anaa naglihok sa natad sa komunikasyon sa mga parokya ang kahibalo kalabot sa umaabot nga lokal ug nasudnon nga piniliay.

Pinaagi sa hybrid (on line ug in-person) nga panagtigom niadtong Enero 22, 2022, gi-edukar ang kapin 45 ka mga sakop sa social communications ministry, lakip niini ang mga nagdumala sa ilang social media ug sa youth ministry sa tagsa-tagsa ka mga parokya.

Nahimong resource speaker ang sakop sa Archdiocesan Political Education Team nga si Atty. Jose Vicente “Blue” Ventosa III kinsa usa ka private legal practitioner, cooperative officer ug public service advocate. Ning bag-o pa lamang boluntaryo siyang mi-apil sa radio group sa Archdiocesan POL-ED team nga gipanguluhan sa Archdiocesan Social Action Center (ASAC).

Gawas sa mga mahinungdanong mga impormasyon kabahin sa kalendaryo sa eleksyon ning tuiga, gipalig-on usab ang kahibalo sa mga mitambong sa mga posibleng mga kalapasan nga mahitabo atol sa piniliay ug unsaon pagpanalipod sa kaugalingon sa panahon nga dunay hulga sa ilang presensya isip sakop sa citizens arm sa Commission on Elections (COMELEC), pinaagi sa Parish Pastoral Council for Responsible Voting (PPCRV).

Dako kaayo ang pasalamat sa Davao Verbum Dei Media Foundation, Inc. ug sa mga partisipante sa maong Political Education sa importante nga mga impormasyon kabahin sa piniliay.

Lakip sa maong political education mao ang pagpaambit sa 5 ka values kon mga kalidad nga pangitaon sa mga botante sa mga magpapili sa Mayo 9, 2022, nga mao ang mosunod:

1. Makadiyos – dunay pagtoo sa Ginoo.
2. Makabuhay – (Makakinabuhi) – dunay pagrespeto sa kinabuhi.
3. Makatao – Makabuluhan at Matino ang Pamumuhay (Makahuluganon ug Hapsay ang Pagkinabuhi)
   Masigasig Tumulong Makaahon ang Bawat Isa – Makatao (Abtik nga Motabang Makahaw-as ang Matag Usa Ka Tawo)
   Makalinga at Maalaahanin (Maamumahon ug Masinabtanon); Makaka-angat ang Lahat, Hindi Nang-iiwan (Mouswag ang Tanan, Dili Mamiya); Makatuwiran at Patas Makisama (Makatarunganon ug Makiangayon nga Maghugoy Hugoy); Common Good – (Alang sa Kaayuhan sa Tanan)
4. Makakalikasan – (Dunay Pag-Amuma sa Kinaiyahan)
5. Makabayan – Malinaw ang Pananaw sa Makabagong Bukas (Klaro ang Panglantaw alang sa Bag-ong Kaugmaon); Makakalayaan (Gawasnon); Makapayapaan, Ayaw ng Karahasan (Malinawon ug Di Gusto sa Kasamok); Maka Totoo (Matinud-anon); Makakatarungan; Makabatas (Motuman sa Balaod)

Gi-aghat ang mga partisipante sa maong Re-training sa paghimo ug 1-minute nga video plug sa matag value o mithi nga gipangita sa usa ka kandidato ug i-upload sa ilang tagsa-tagsa ka mga Facebook page.

Mamahimo usab nga i-share kini sa facebook page sa DXGN 89.9 Spirit FM ug sa Davao Catholic Herald Official Facebook Page.

Hinoon duna pay ikaduha nga hugna sa maong pagbansay alang sa pamaagi sa pag-file ug report.

Gitakdang pagahimoon ang maong ikaduhang hugna sa training sa bulan Pebrero 26, 2022 pinaagi gihapon sa hybrid nga panagtigom.