Sakto ba ang imong Gibuhat?

Ikaunom nga Domingo sa Pagkabanhaw (May 22, 2022)
Mga Buhat 15:1-2,22-29 | Gipadayag 21:10-14,22-23 | Juan 14,23-29

Nahinumdom ako sa advertisement sa Coke Sakto nga nag-ingon nga “sakto ra gyud ang pagkabusog sa tawo kon imnon ang Sakto”. Unsaon man nato nga ma-sakto ang atong kaluwasan ug kalipay? Unsaon nato pagsunod kang Hesus nga nagsangyaw kanato sa atong ebanghelyo karon nga ang saksi sa kamatuoran sa gugma mao ang pagkamatinud-anon. Kay kon tinuod kitang nahigugma kaniya ipakita nato nga gisunod nato ang iyang sugo. Mobuhat kita sumala sa iyang buot nga ipabuhat kanato.

Si Hesus nanigurado usab nga kanunay nato kining mahinumdoman. Nagpasalig siya nga dili gayud kita mawala, Buot gayud niya nga masabtan nato kining iyang mga buhat alang sa atong kaluwasan. Busa iyang gipadala ang Balaang Espiritu nga mao ang atong abogado. Siya ang atong panabang. Siya ang molamdag ug mohatag kanato sa inspirasyon aron makatuman sa mga sugo ni Hesus. Siya usab ang mohatag sa kusog aron magpuyo kita sumala sa Iyang pulong.

Mga higala, kon nagkalisod kita sa pagtuman og pagbansay sa mga gisugo ni Hesus. Dagan ngadto sa Espiritu Santo. Pag-ampo ngadto kaniya. Dili kita niya biyaan. Sakto siya nga Espiritu alang sa paghapsay sa tanang atong kahadlok, kahingawa, kabalaka, pagpas-an sa mabug-at nga palas-unon, pag-antus, walay kalinaw ug uban pa nga gikinahanglan natong panabang aron kita maluwas ug magmalipayon. Siya ang gibilin kanato ni Hesus aron mahimong giya sa dalan sa gugma nga giagian ni Hesus nga mao usab ang atong paga-agian. Karong adlawa maayo segurong iampo nato kini matag gutlo. “Kunsad Espiritu Santo, kunsad nag-ampo ako. Kunsad langitnong kalayo, inita kining dughan ko.”Amen. Aron kita makabansay sa matuod nga gugma.