DaDiTaMa nangandam alang sa MSPC XVII

Nangandam na karon ang simbahan sa Probinsya sa Davao, ang Arkidayosis sa Davao, Dayosesis sa Digos, Tagum ug Mati (DADITAMA) alang sa ika-17 nga panagtigom sa Mindanao Sulu Pastoral Conference (MSPC XVII).

Gitakdang pagahimoon ang MSPC XVII sa Cagayan de Oro sa Nobyembre 7-11, 2022 kansang host mao ang Suffragan sa CABUSTAM kon Arkidayosis sa Cagayan, ug Dayosesis sa Butuan, Surigao, Tandag ug Malaybalay.

Nabalda sa pandemya ang matag tulo ka tuig nga panagtagbo sa mga Obispo, kaparian ug layko sa simbahan sa Mindanao ug Sulu ulahing gipahigayon dinhi sa DADITAMA, kansang host mao ang Arkidayosis sa Dabaw niadtong tuig 2017, Oktubre 16-20 sa Water Front Insular Hotel, diin gihisgutan ang tema: “Parish as Communion of Communities”.

Gilaumang tambongan sa kapin dos cientos ka mga delegado gikan sa 21 ka mga dayosesis sa Mindanao ug Sulu ang maghisgot kalabot sa tema ning tuiga nga mao ang “The Gift of Faith and New Evangelization as a Synodal Church.”

Sa gi-presentar ni Msgr. Julius C. Rodulfa, pangulo sa Pastoral Office sa Arkidayosis sa Davao atol sa ulahing panagtigom sa mga Obispo, kaparian ug mga layko sa DADITAMA niadtong Hunyo 8, 2022 sa Dayosis sa Digos, gisgudan ang mga pagpangandam sa MSPC XVII niadto pang bulan sa Abril sa mga Diocesan Point Persons.

Lakip sa pagahisgutan sa MSPC XVII mao ang Sub-regional Synodal Consultation nga gihimo sa ulahing panagtigom sa DADITAMA Hunyo 7, 2022 sa Dayosis sa Digos.

Gilauman nga andamon sa matag dayosis ang tagsa-tagsa ka kasaysayan sa missionary commitment ug ilhon ang mga labing maayong mga batasan sa pag-highlight sa missionary creativity sa bulan sa Hulyo 2022 ug hiusahon kini sa bulan sa Agosto, dayon pagahimoon ang usa ka video clip kalabot sa Metropolitan Best Practices sa DADITAMA.

Ilhon ang mga Best Practices sa natad sa BEC – Stewardship; BEC – Ecology; BEC – Interreligious Dialogue & Ecumenism; BEC – Indigenous Peoples Apostolate; ingon man ang Joint Disaster Responses ngadto sa mga apektado nga mga dapit sa kalamidad ug disaster preparedness; ug ang Poverty Alleviation Initiatives sama sa Banko sa Kabus, ug uban pa.

Ang MSPC maoy usa ka forum sa ideas nga nagpahigayon sa panaghiusa sa lokal nga mga simbahan sa Mindanao. Sa gilatid sa iyang panglantaw, tumong sa MSPC mao ang pag-duso sa kultura sa mga lumad ug sa pagbaton ug usa ka dayalogo sa kinabuhi sa mga Kristyanos, Muslim ug mga Lumad sa Mindanao.

Ang labing unang MSPC gihimo sa Davao City sa tuig 1971 sa tema: “Building Christian Communities: Worshipping, Teaching, Serving,” ug ang misunod nga mga kumperensya gihimo matag tulo ka tuig.