Mag-uuma Panagsa, Pari Kanunay

Si Fr. Felix Bontog usa ka pari sa Missionaries of Jesus (MJ) nga originally taga Bohol diin karon ang iyang ika-upat nga tuig sa pagkapari. Ang kasinatian ni Padre layo kaayo sa kinabuhi sa syudad tungod dili ang ka busy sa nagoverlap nga schedule ang iyang kanunay nga sagubangon kundili ang iyang mga tanom nga mga gulay ug kahoy palibot sa parokya.

Isip kura paroko, malipayon si Fr. Felix nga nagserbisyo sa mga katawhan sa iyang parokya nga adunay napulog-siyam (19) ka GKK. Usa sa mga hagit sa iyang kasamtangang tahas ang pagpadagan sa mga lihukunon sa parokya tungod dili pa kini ka sustenar diha sa daghang trabahante. Pero bisan pa niana, mapasalamaton gihapon siya sa Ginoo tungod sa suporta ug gugma nga gipakita sa iyaha sa mga katawhan nga iyang gialagaran. Gani, duna silay bag-ong natukod nga adoration chapel ibabaw sa parokya ug kini nagsugod na diha sa adlaw-adlaw nga exposition sa balaang Eukaristiya.

Dugang pa niana dunay partnership ang San Miguel Parish ug ang Holy Cross of Davao College, Inc. mahitungod sa mga programa sa pagamuma ug pagatiman sa kinaiyahan sa maong lugar ug sa spiritual formation sa mga katawhan sa parokya. Kini gikalipay ug dako ni Fr. Felix tungod dako kini nga tabang dili lang sa mga katanuman ug kinaiyan kundi apil sab ang mga katawhan labi na diha sa mga Indigenous Peoples sulod sa parokya.