Mga Lakang sa Katilingban

Ang konstruksyon sa Deca Homes Resort Residences, nga nahimutang sa Tacunan, nagsugod niadtong Agosto 2006 ug nahuman niadtong 2016. Bisan tuod lainlaig relihiyon ug kultura ang mga nagpuyo sa Deca Homes, pinaagi sa management nahimong posible ang gawasnong pagdayeg sa mga Katoliko. Ug sukad niadtong 2009, ang Eukaristiya nga Kasaulogan gihimo sa Clubhouse kada Dominggo sa alas 3:30 sa hapon.

Ang maong katilingban ubos sa Immaculate Conception Parish sa Mintal nagpahigayon ug piniliay alang sa mga lideres sa GKK sa unang mga adlaw sa Agosto 2010 aron matubag ang gikinahanglang kondisyon ug rekisitos sa pagporma ug GKK. Ang administrasyon sa Deca Homes mihimo sa panaad sa pagdonar og yuta alang sa permanente nga lokasyon sa kapilya sa ilang inisyatiba. Tungod niini, ang komunidad sa Deca nagtukod ug temporaryong kapilya nga ginganlag San Antonio De Padua GKK.

Panahon sa groundbreaking ceremony, ang Santos nga Misa gipangulohan ni Reverend Fr. Jovil Bongay, kanhing kura paroko sa ICP Mintal, alang sa permanenteng kapilya nga gitukod niadtong Hunyo 11, 2014. Sa okasyon sa ika-upat nga Patronal fiesta sa GKK niadtong Hunyo 14, 2014, ang permanenteng kapilya giinagurahan ug gibendisyonan ni Most Rev. Romulo G. Valles, D.D., Arsobispo sa Davao. Ang kapilya nahuman og natukod tuig 2016 ug pormal nga gidonar ngadto sa Archdiocese. Ang aktwal nga pag-turn over gihimo sa ilang ika-6 nga patronal fiesta niadtong Hunyo 11, 2016 diin ang nahisgutang kapilya makapaigo ug 816 ka tawo.

Kini nga GKK milambo ug midaghan ang mananambong sa misa matag Dominggo. Kini naghatag dinha sa timailhan nga ang GKK usa ka adlaw mahimong molihok isip parokya. Mao nga gihimo kining “quasi-Parish”; ug sa kadugayan, mahimong “tinuod” nga parokya. Si Rev. Fr. Ricky C. Peñalosa mao ang unang pari nga nagdumala sa komunidad. Sa paglabay sa panahon, si Rev. Fr. Leif Simbajon maoy mipuli isip bag-ong pari nga nagdumala sa quasi-parish human si Fr. Ricky nahimong kura paroko sa Virgen Dolorosa Parish, Babak.

Ang San Antonio De Padua GKK mamahimong usa ka parokya sa Archdiocese of Davao ugma Disyembre 12, 2022, ug kuhaon ang ngalan nga Our Lady of Guadalupe Parish. Ang mga utlanan sa maong bag-ong parokya mao ang mga barangay sa: Brgy. Tacunan, Brgy. Tugbok, Brgy. Ula, ug Brgy. Matina-Biao.

Ang Our Lady of Guadalupe maoy napili nga ngalan sa parokya tungod sa halapad nga debosyon sa Mahal nga Birhen Maria taliwala sa ubang mga GKK nga miyembro na sa komunidad. Dugang pa, ang Immaculate Conception Parish nagsilbing inahan nga parokya tungod sa dugay na nga debosyon niini ngadto sa Mahal nga Inahan. Ang titulo nga “Our Lady of Guadalupe” wala pa mahatag sa usa ka simbahan sulod sa Archdiocese sa Davao. Sa katapusan, kini usa ka ekspresyon nga pagpasalamat sa 8990 Holdings, Inc. sa paghatag sa dako nga estatwa sa Our Lady of Guadalupe. (Bro. Angelo Espinas)