Mahimayaong Kamatayon

Ika-5 Domingo sa Panahon sa Kwaresma (March 26, 2023)
Ez. 37:12-14 / Ps. 130:1-2, 3-4, 5-6, 7-8 / Rom. 8:8-11 / Jn. 11:1-45

Si Jesus miingon, “Kuhaa ang bato.” Si Marta, ang igsoon nga babaye sa namatay, miingon kaniya, “Ginoo, baho na karon; upat na siya ka adlaw nga namatay.” Si Jesus miingon kaniya, “Wala ba ako mag-ingon kanimo nga kon motoo ka makakita ka sa himaya sa Dios?” Busa, gikuha nila ang bato.”

Sa pagkatinuod, ang kamatayon dili sayon nga atong atubangon, o bisan pa sa paghunahuna mahitungod niini. Kon kita moadto sa usa ka haya, diin ang mga buhi moduaw sa mga patay, o kon kita moadto sa usa ka sementeryo o usa ka lubnganan, atong makita ang atong mga kaugalingon nga nag-atubang sa kamatayon, ug sa kasagaran kita madala sa paghunahuna sa atong kaugalingong kamatayon. Sa ingon, kini usa ka kanunay nga pahinumdom sa kahuyang sa kinabuhi. Pinaagi sa kamatayon, kita gipahinumdoman kon nganong ang kinabuhi bililhon kaayo. Apan ang pinakalisud nga tambal nga matulon mao nga kita, sama sa tanan nga dunay kinabuhi, kinahanglan nga moagi niini.

Mao nga ang atong kaluwasan mao gayud ang pagyukbo sa atubangan sa Dios, ang pagtuo Kaniya, nga nagpasabot sa atong pag-abli sa atong kaugalingon ngadto Kaniya aron kita mabuhi. Kon kita mosalig Kaniya, kita kinahanglan usab nga magkinabuhi ingon nga mga sumusunod ni Kristo. Ang pagtuo dili lamang sa pulong kondili sa mga buhat usab. Kada adlaw kita mamatay ug mobangon, mamatay sa sala ug sa tanang butang nga mosangpot sa sala, mobangon diha sa bag-ong kinabuhi ni Kristo. Kini nga proseso mao ang kinauyokan sa atong pagsaulog sa Kwaresma. Kung dili kita mamatay, dili kita makasinati sa pagkabanhaw ni Kristo. Wala kita magkinabuhi sa kahadlok sa kamatayon tungod kay ang atong pagtuo nagpasalig kanato sa bag-ong kinabuhi.

Kon kita maguol tungod sa kamatayon sa atong mga minahal, atong tugotan ang saad ni Jesus sa kinabuhing dayon nga molanog sa atong mga kasingkasing, maghatag kanato ug kahupayan, mag-andam kanato sa pag-atubang sa atong kaugalingong kataposan, kay nahibalo nga pinaagi sa atong pagtugyan kang Jesus, atong ipakita ang Iyang himaya. Busa, dili angay kahadlokan ang kamatayon tungod kay sayod kita nga sa umaabot nga panahon anaay himaya nga muabot kanato. (Bro. Ranie Boy Pamplona)