Kadaugan Batok Sa Kamatayon

Solemnidad sa Pagkayab ni Jesus sa Langit (May 21, 2023)
Acts 1:1-11 / Ps 47:2-3, 6-7, 8-9 / Eph 1:17-23 / Mt 28:16-20

Makahuloganon ang mga aspeto sa bag-ong kinabuhi ang makita sa Ikaduhang Pagbasa karong Solemnidad sa Pagkayab: “Hinaut nga mahibal-an nato kung unsa ang paglaum nga iyang gitawag kanato, unsa ang mga bahandi sa iyang mahimayaon nga panulundon sa mga santos, ug unsa ang dili masukod nga kahalangdon sa iyang gahum sa ato nga nagatuo” (Efeso 1:18-19).

Isip mga Kristyano, ang atong paglaum, lig-on tungod sa kamatayon ug pagkabanhaw ni Jesus. Tungod kay gibuntog ni Jesus ang sala hangtod sa kahangturan, makapuyo kita sa kagawasan ug kalinaw, bisan unsa pa ang atong maatubang nga sitwasyon. Kita napasig-uli na sa Dios. Dili na kita estranghero. Kada adlaw, magpuyo kita nga may pagsalig, kay nahibalo kita nga ang atong Dios nag-uban kanato aron sa pagpalig-on ug paghupay kanato.

Ang atong paglaom natukod usab sa kamatuoran nga nadaog ni Jesus ang kamatayon alang kanato. Sa iyang pagkayab, giablihan ni Jesus ang pultahan alang kanato. Bisan tuod kita mga makasasala, kita gipasaylo ug gitubos. Kita karon bug-os nga gihigugma ug gidawat nga mga anak sa Ginoo, ug kita magpuyo uban kaniya hangtod sa kahangtoran.

Samtang kita nagpuyo matag adlaw sa paglaum sa atong mahangturong kabilin, kita makasugod sa pagtilaw niini nga mga panalangin dinhi ug karon sa kalibutan. Kini kabahin sa “dili masukod nga kadako sa iyang gahom kanato nga nagtuo.” Sa wala pa siya mobalik sa iyang Amahan, si Jesus misaad sa iyang mga tinun-an nga bisan kinsa nga nagtuo kaniya makahimo sa pagpahawa sa mga demonyo, pag-ayo sa mga masakiton, ug paghimog mga ilhanan ug mga katingalahan sa iyang ngalan (Marcos 16:17-18). Giunsa man? Pinaagi sa gahum sa Balaang Espiritu nga nagpuyo sulod kanato. Sama nga Espiritu Santo nga nagbanhaw kang Jesus gikan sa kamatayon, anaa usab sa atong mga kasingkasing, nagdapit kanato sa pagtugyan ngadto kaniya ug naghatag ug gahum kanato sa pagkinabuhi diha sa kadaugan sa pagkabanhaw. Walay hagit nga dako kaayo alang sa usa ka anak sa Dios! (Bro. Ignatius Gonzales, CFA)