Bikaryato sa St. James, Nanguna sa Youth BBS

HULYO 22-23 – Gipahigayon sa Bikaryato sa St. James ang pinakauna sa Arsidyosis nga Youth Basic Bible Seminar 1 ug Facilitators Skills Training didto sa St. John the Baptist Parish – Lasang. Kini gitambongan sa 25 ka partisipante gikan sa : St. Francis Assisi, Laverna; St. Francis Xavier, Tibungco; St. James, Bunawan; St. John the Baptist, Lasang; ug San Miguel, Panacan, nga mga sakop sa maong bikaryato.

Ang maong panghitabo inisyatibo sa Archdiocesan Bible Apostolate of Davao (ABAD) coordinators nga gipanguluhan ni Mr. Concordio Pondias nga Coordinator sa apostolado, nga gitabangan sa mga facilitators nga sila Naneth Duller, Roselyn Malangle, Diosdado Chatto, Pedro Cristuta, ug Zyra Duller.

Naglangkob sa upat ka konperensya ang unang adlaw sa seminar diin gipanguluhan sa upat ka tigpamaba nga mao sila Dominggo Alob, Elpidio Repompo, Carlwin Tantan ug John Darrel Rillo. Ug sa ikaduhang adlaw gipahigayon ang Facilitation Training nga gipangunahan ni Hermie Carillo.

Human sa pagtudlo sa mga pamaagi sa pagdala sa usa ka seminar, misunod dayon ang Practicum sa mga partisipante diin sila ang naghimo sa ilang mga kaugalingong visual materials dala ang ilang mga nakat-onan sa unang adlaw ug nagdumala sa ilahang kaugalingong seminar.

Puno sa kalipay ang mga partisipante nga aduna na usab silay bagong nakat-onan uban ang mga tawo nga likod sa malampuson nga hitabo. Musunod na usab ang ubang mga bikaryato sa pagpahigayon niining maong seminar ug training. (Ma. Joneila Laruya)