Pag-ila ug Pagsinati sa Dios Diha sa Kinabuhi

Ika-26 nga Domingo sa Ordinaryong Panahon (October 1, 2023)
Ez 18:25-28 / Ps 25:4-5, 6-7, 8-9 / Phil 2:1-11 / Mt 21:28-32

Ang kaabli sa kaugalingon diha sa Ginoo mao ang unang ang-ang diha sa pagsunod sa kabubut-on sa Dios. Ang Ginoo nagtanyag kanato nga atong talikdan ang atong mga sala ug molingi kita sa Dios og atong isentro ngadto kaniya ang atong panglantaw. Siya andam modawat kanato bisan tuod kita wala mosunod kaniya sa una apan kon mag-usab kita ug mosunod kita kaniya kita mamahimong iyang mga anak sama sa unang anak sa atong ebanghelyo nga diin bisan tuod mibalibad siya sa una apan sa dihang nausab ang iyang hunahuna siya mituman sa sugo sa iyang amahan.

Kita nga mga anak tungod kay dili hingpit ang atong pag-ila sa Dios kita malingla sa mga hanyag sa kalibutan. Mabutahan kita sa mga kalibutanong kamatuoran ug isalikway nato ang mga kamatuoran sa Dios nga maoy maghatag kanato sa hingpit nga kagawasan. Tungod sa sala ang atong paghukom sa pagsunod sa maayo ug paglikay sa sala dili hingpit. Makahatag kita sa atong hukom pinasikad sa atong mga kasakit, biases ug prejudices. Apan ang Dios nagpahinumdom kanato nga siya andam nga modawat kanato bisan sa atong pagkamakasasala kon kita maningkamot sa pagsunod ug pagpuyo sa iyang mga pagtulon-an. Kita nga mga naninguha sa pagkab-ot ug pagsunod sa Dios sa tanan natong kinabuhi hatagan kita sa Dios sa grasya aron matuman nato kini.

Sa pangutana sa atong Ginoo kon si kinsa sa duha ka anak ang nagbuhat sa kabubut-on sa amahan ang mga tawo mitubag nga nagkanayon nga ang unang anak ang nagbuhat sa kabubut-on sa amahan apan ang atong Ginoo wala misulti kon sakto o sayop ba ang ilang tubag apan siya miingon kanila “Sa pagkatinuod nagaingon ako kaninyo nga ang mga kobrador sa buhis ug ang mga daotang babaye mag-una kaninyo ngadto sa gingharian sa Dios.” Kini naghulagway nga kon ang atong basehan sa atong paghukom mao lamang ang atong kaugalingong katakos ug mga kalibutanong kahibalo kita wala makaila sa Dios pag-ayo. Apan kon ang atong gamiton ang mga mata nga maluluy-on sa Dios ug ang iyang mga pagtulon-an kita dili halayo sa gingharian sa Dios. Kita nga nakakita na ug nakasinati sa iyang kalooy ug gugma motoo gayod kaniya. Ato gayod nga ablihan ang atong kaugalingon aron kita maka-ila ug makasinati sa iyang dakong kalooy ug gugma diha sa atong kinabuhi. (Rev. Soren Abellanosa)