Food is Life! Bahalag walay love life.

Ang kasulatan nag-ingon, “Ang tawo mabuhi dili sa pan lamang, kondili sa matag pulong usab nga isulti sa Dios.” (Mt. 4:4) Apan alang kanatong mga tawo, bililhon usab nga kita mokaon sa pan aron kita makapadayon og buhat sa sugo ug kabubut-on sa Dios. Apan unsaon man nato karon kung ang atong mga palitonon miusbaw man hinoon? Paigo ba ang atong inadlaw-adlaw nga paningkamot aron ang mga panginahanglan atong makab-ot?

Bugas, sud-an, gasolina ug uban pa, mao kini ang kasagaran nga mulo sa katawhan ug giagwanta. Tinood bisan kinsa sa atoa nag-atubang sa maong kalisod apan gikaya ra. Sa matag adlaw sa atong pagpaningkamot dili gyud mawala ang kaguol sa adlaw’ng muabot. Kini tungod sa kapait nga atong nasinati, ug sa mga pagsulay sa atong kinabuhi. Pipila sa katawhan nga among nakahinabi miingon “mahal na kayo ang mga palitonon karon, ang among sweldo nga maipon igo ra gyud pang kaon.” Dugang pa nila nga sa nagkadugay ang panahon, nagkataas usab ang palitonon. “Dili man sa ingon nga gikumpara ang kagahapon apan sa nahitabo karon kutob nalang gyud mi sa paghandum.” Ang sakit nga hunahunaon mao nga daghan sa atong mga batan-on karon nasakrispyo ang edukasyon tungod lang sa krisis sa pagkaon. Sa kamahal sa palitonon, sila nakapangutana kung unsaon pa nila pagpaambit sa ilang pagkaon, nga kung sa pamilya lang daan iyahay na ug diskarte ug pagpangita og pamaagi. Adunay miingon nga anaay mga adlaw nga ang nilung-ag nga kan-on sagolan nalang ug mga lagotmon aron lang gyud mabusog ug ang tanan makakaon. Dili dali ang kinabuhi nga ilang nasinati apan tungod kay dili sila makapili, ila kining gidawat isip parte na sa kinabuhi.

Apan, bisan pa sa kalisod sa panahon nagpadayon sila nga malaumon ug madasigon. Daghan kanila nanghinaut nga unta kung musaka man ang presyo sa mga palaliton ang pang-unang panginahanglan (basic needs) magpabilin untang barato gihapon nga bisan ang ubos sa katilingban makahimo sa pagsangkap alang sa ilang kaugalingon. Matud pa nila Ate Dolly ug Ate Elena, mga parokyano sa Parokya ni San Pablo, luyo niining tanang pagsulay nga nasinati sa atong katilingban, kanunay unta natong hinumduman nga ang pagsalig ug pagampo sa Ginoo dili nato mahikalimtan. Naglisod man kita sa kataas sa presyo sa palitonon apan magpabilin unta kitang magmakugihon ug sa gihapon sa Ginoo masaligon ug ang pagtoo mapalig-on. (Sem. Aries Rosales Infiesto and Sem. Resty Juyo Cabahug)