Rooted in love

Nagmalampuson ang gipahigayon nga Parish Youth Day sa mga kabatan-onan sa Parokya ni San Juan Bautista, Lasang niadtong milabayng Disyembre 27-28, 2023 diin dul-an kuatro syentos ka mga partisipante ang mitambong.

Gisugdan ang maong panagtigom sa paraliturgy kon diin gihimo ang veneration, pagpasidungog sa Balaang Krus ug enthronement.

Dugang pa niana, “Rooted in love” ang nahimong tema, kun diin gipaambit, nasinati ug napamalandungan nga ang tuburan sa tanan nga ania kanato ug ang kanunay nagduso sa paghalad sa atong kaugalingon diha sa pag-alagad mao ang gugma. Naghatag usab ug kasadya ang gipahitabo nga encounter with the priest uban sa kura paroko nga mao si Rev. Fr. Jovilo B. Bongay, kon diin nagpadayag ug mga pangutana, concerns and clarifications ang mga kabatan-onan kalabutan sa gimbuhaton sa apostolado ug sa simbahan. Ug dayon gisunod ang fast talk nga naghatag ug kalipay sa matag usa.

Pagkagabii gihimo ang socio-cultural night nga mga pasundayag sa nagkadaiyang festival and cultural dances nga mao ang labaw nga nagpahugyaw sa kasaulogan. Gisunod ang praise and worship nga gipangunahan sa Parish Youth Apostolate of Bunawan.

Human sa tanang gimbuhaton, gihimo ang exposition of the Blessed Sacrament and adoration nga gipanguluhan ni Rev. Fr. Florencio A. Acedo, Jr. nga nagpasinati sa kinabuhi sa atong Ginoong HesuKristo diha sa atong kinabuhi ug sa mapadayonong misyon sa pagpakaylap sa maayong balita diha sa mga kabatan-onan.

Gitapos ang maong panagtigum sa Santos nga Misa nga gipanguluhan ni Rev. Fr. Jovilo B. Bongay ug Rev. Fr. Florencio A. Acedo, Jr.

Sa katapusan, ang Parish Youth Apostolate sa parokya ni San Juan Bautista buot magpaabot sa tim-os nga pagpasalamat sa tanan nga nahimong kabahin sa kalamboan sa maong panagtigum. Dalaygon ang Dios! (Steven Jay L. Del Rosario)