Kasingkasing nga Puno sa Diosnong mga Butang

Ika-3 Dominggo sa Kwaresma (March 3, 2024)
Ex 20:1-17 / Ps 19:8, 9, 10, 11 / 1 Cor 1:22-25 / Jn 2:13-25

Ang Ebanghelyo sa ikatulo nga Dominggo sa kwaresma nagsaysay kabahin sa pag-abog ni Jesus sa mga namaligya og mga mananap didto sa templo ug ang paglimbuwad sa mga tig-ilis og kwarta. Kining maong higayon usa ka pagpadayag nga ang ilang pagsimba sa Dios taphaw na kaayo ug ang mga nagdumala sa templo, ang mga kadagkoan sa mga Judiyo nahaylo na kaayo sa mga kalibutanong mga butang.

Kita nga mga nagpadayon sa pagpamalandong sa atong padayonon nga pagsunod sa mga lakang sa atong Ginoong Jesus molantaw niini nga kahimtang nga usa ka kahigayonan aron masusi usab nato ang atong kaugalingon. Unsa usab ang anaa sulod sa atong tagsa-tagsa ka mga kasingkasing? Kalibutanon ba nga mga butang ang anaa niini o ang mga pagtulon-an sa atong Ginoo? Ang pagsaway sa atong Ginoo ngadto sa mga tigpaka-aron-ingnon nga mga Judiyo nga daw sila nagtuman sa kabubut-on sa Ginoo pinaagi sa ilang pagpamaligya og mga hayop ug pagkambyo ug mga salapi didto sa templo aron mamahimong halad. Apan diha sa tago ang ilang gihimo sama ra sa pagpangilad ug ilang gihimo nga tagoanan sa mga kawatan ang balay sa Ginoo.

Diha sa atong mga kasingkasing nga diin atong mabati ang presensya sa Dios ug nga diin kita makigtagbo sa Ginoo. Ang Dios ba gayod ang tinuod nga naghari sa atong kasingkasing o ang mga kalibutanon nga mga kahingawa ang nag-okopar niini.

Ang Ebanghelyo ni San Juan nagpahinumdom kanato nga isip mga sumunod sa atong Ginoo atong hinloan ang atong mga kasingkasing ug kinabuhi aron makita nato sa dayag ang presensya sa Dios diha kanato ug dili kita sawayon sa atong Ginoong Jesucristo nga mga tigpaka-aron-ingnon.

Sa katapusan, ang hagit sa atong Ginoo nga gub-on nato ang templo aron iyang tukoron pag-usab. Kini usa ka pagpadayag nga atong gub-on ang mga natukod diha sa atong kinabuhi sulod sa taas nga panahon nga sukwahi sa mga pagtulon-an sa atong Ginoo ug atong paharion ang Dios diha sa atong kinabuhi aron siya mismo ang motukod pag-usab nga anaa ang tinood nga dalan, ang kamatuoran, ug ang kinabuhi. Atong paningkamotan nga sulod niining panahon sa kwaresma atong matagamtaman ang presensya sa atong Ginoo pinaagi sa pagdumili sa atong mga kaugalingon, pagpas-an sa atong krus ug pagsunod kaniya. Mao kini ang tinood nga paghalad ngadto sa atong Dios nga diin ang atong Ginoong Jesucristo maoy naghatag kanato og panig-ingnan. (Rev. Soren Abellanosa)