Pagsakripisyo padulong sa Ginoo

Ika-2 Dominggo sa Kwaresma (February 25, 2024)
Gen 22:1-2, 9-13, 15-18 / Ps. 116:10, 15, 16-17, 18-19 / Rom 8:31-34 / Mk 9:2-10

Tingali pipila kanato gipangutana sa uban: kung kita mamatay gusto ba ta mahilangit? Syempre pipila kanato tingali kanato muingon “oo uy!” Kinsa may dili gusto mahilangit? Apan, ang dakong pangutana karon: andam ba ta mosakripisyo sa atong kaugalingon aron makaadto ta sa langit?

Ug kini maoy dakong problema karon, usahay o kanunay kita malit-ag niining mga senario, tungod kay wala paman napuy-an si Kristo sa atong kinabuhi. Wala paman ta nakasinati og usa ka langitnong kasinatian nga makatandog kanato sa atong kinabuhi.

Mao nang, kutob rata estorya og dili nata mubuhat sa angay natong buhaton isip usa ka sumusunod ni Kristo, kinahanglan nato mosakripisyo alang kang Kristo. Kanunay hinumdumi, wala bayay libre nga pagsakay padulong sa langit, busa maningkamut kita sa pagbuhat ug maayo.

Sama sa gibuhat sa mga tinun-an ni Jesus, human sa lumalabay nga langitnong kasinatian ni Pedro, Santiago ug Juan sa bukid sa Transpigurasyon. Nanaog sila balik niining kalibutana aron atubangon ang ilang tagsatagsa ka bahin sa sakripisyo alang sa pag-uswag sa Gingharian sa Dios.

Dali ra unta nilang malikayan ang sakripisyo pinaagi sa pagpalayo sa ilang kaugalingon gikan sa Ginoo. Apan ilang gipili nga ipabilin kini uban kang Jesus bisan pa sa tanang kalisdanan ug pagsulay.

Ug mao kini ang dakong hagit kanatong tanan.

Unsa may atong gibuhat, isip usa ka anak sa Dios? Duna ba kitay pangandoy nga mahilangit? Ug kung duna kita’y pangandoy, ang sunod nga pangutana, duna ba kitay gibuhat nga sakripisyo alang sa atong Ginoo? O basi mao lang gihapon, kutob rata estorya o wala na sa buhat?

Busa, maningkamut ta, nga atong mapuy-an kining hagit sa atong ebanghelyo karon nga magsakrispyo para sa Ginoo aron sa umaabot nga panahon, Kitang tanan mamahimong malipayon atubangan sa atong Ginoo.

Sa katapusan, mag-ampo kita nga unta kita mahisama sa mga apostles. Paghuman sa usa ka talagsaon nga kasinatian pinaagi sa Santos nga Misa, kita unta maningkamut usab sa pagbuhat og sakripisyo para sa atong Ginoo, kanunay nato ibilin ang dakong pagsalig diha kaniya. Amen. (Rev. Ranie Boy Pamplona)