Kamatuoran sa Pagkabanhaw

Dominggo sa Pagkabanhaw sa Ginoo (March 31, 2024)
Acts 10:34, 37-43 / Ps 118:1-2, 16-17, 22-23 / Col 3:1-4 or 1 Cor 5:6-8 / Jn 20:1-9

Ang kamatuoran sa pagkabanhaw gikan sa mga minatay usa ka talagsaong kahigayonan aron ang atong pagtoo sa atong Ginoong Jesucristo mahingpit. Ang Ebanghelyo ni San Juan nagsayasay mahitungod sa pagkabanhaw sa atong Ginoo gikan sa iyang kamatayon. Sulod sa tulo ka adlaw, ang pagpasakit, pagpakamatay ug ang iyang pagkabanhaw gikan sa mga minatay naghatod kanato sa pagtoo sa tanan nga iyang gisaad alang kanatong tanan.

Sa pagkakita sa mga tiunun-an nga wala na didto ang Ginoo sa iyang gilubngan, sila wala makasabot sa tanan nga kamatuoran nga gipadayag sa maong kahigayonan. Ang kasulatan naghisgot nga kinahanglan gayod nga mabanhaw ang atong Ginoo gikan sa mga minatay. Ang lintonganay sa atong pagtoo mao gayod nga kita makakita ug makasabot sa hinay-hinay nga ang atong Ginoo mabanhaw. Ang pagkabanhaw niya ang usa sa labing taas nga misteryo nga gipadayag sa atong Ginoo. Si Jesucristo ang unang nabanhaw gikan sa mga minatay naghatag kanato sa paglaum nga sa umaabot kita sama kaniya mabanhaw usab gikan sa mga minatay ug makig-uban kaniya sa hingpit.

Ang pag-ampo sa katilingban (collect) nagsaysay mahitungod sa kalipay karong adlawa kanus-a si Jesucristo mipakita sa iyang kadaugan batok sa kamatayon pinaagi sa iyang pagkabanhaw ug mipakita sa iyang mga tinun-an ug kang Santa Maria aron pagmatuod nga ang kalibutan dili gayod makapugong sa iyang kahalangdon. Ang atong mga panghinaut nga ang kadaugan sa atong Ginoo mao untay pasiuna sa langitnong pakig-uban didto sa langitnong bangkite nga diin ang atong kalipay mahingpit.

Sa katapusan, ang atong pagtoo nagtudlo kanato nga ang atong Ginoo dili gayod halayo kanato. Dili lamang siya anaa sa atong hunahuna o anaa sa mangitngit nga bahin sa kalibutan nga dili nato makita. Ang atong Ginoo nagpakatakos sa pagpakatawo sama kanato pinaagi kang Birhen Maria. Nakighimamat kanato nga iyang mga binuhat, apan gisalikway nato ang iyang imbitasyon sa pagkighigala. Gipalabi nato ang pagpuyo sa kangitngit kaysa kahayag nga mao ang atong Ginoong Jesucristo. Ang kasakit ug kamatayon nga giagian sa atong Ginoo mao ang bayad sa atong mga sala. Ang dugo sa atong Ginoo mao ang hingpit nga sakripisyo aron mahibalik kita sa Dios. Ang pagkabanhaw mao ang nagpamatuod sa tanan nga gihimo sa atong Ginoo. Ang atong Ginoong Jesucristo gayod ang matood nga pinadala sa Amahan aron sa pagluwas sa kalibutan gikan sa sala ug kamatayon. (Rev. Soren Abellanosa)