Kinabuhing Kristohanon, Palig-unon

Malipayong misugat kang Archbishop Romulo G. Valles, D.D. ang mga parokyano sa Virgen Dolorosa nga gipangunahan ni Rev. Fr. Ricky Peñalosa ug Rev. Fr. George Garcia SVD sa Babak Port (MAEWESS) niadtong Marso 14, 2024. Kabahin usab sa seremonya ang paghatag og lei sa mahal nga Obispo nga gihatag ni Samuel Javier “Samboy” Oliver Decatoria uban sa iyang pamilya.

Duyog sa kasadya, nadungog ang tugtog sa mga drums ug gipakita sa mga mananayaw gikan sa Samal Island City College ang Kultura sa Islang Maanyag para sa opening Salvo sa Pastoral Visit ug misunod dayon ang motorcade padulong sa simbahan.

Sa pag abot sa gate sa simbahan, nakighimamat ang mahal nga Obispo sa mga katawhan nga naghulat sa daplin sa kalsada. Human niini gisugdan dayon ang seremonya piaangi sa hall marking o pagpirma sa handumanan sa pagbisita sa atong mahal nga Obispo ug misunod dayon ang pagdagkot sa kandila sa Candle house para sa paghalad sa pag –ampo uban sa katawahan sa parokya.

Misunod dayon ang hamubong seremonya sa pagsulod sa simbahan diin si Fr. Ricky mihalok sa Crucifix timaan sa lig-ong pagtoo diha kang Kristo isip mga katoliko ug ang pag bedisyon sa katawhan. Sa pag a-bot sa altar naghalad ug pag-ampo para sa Obispo ug mahinangpon nga gidawat ni Fr. Ricky, ug pormal nga giablihan ang duha ka adlaw nga Pastoral Visit 2024.

Uban sa kalipay ug kamaya gisugdan dayon ang usa ka concelebrated mass nga gipangunahan ni Archbishop Romulo G. Valles, D.D., Fr. Ricky Peñalosa, Parish priest, Fr. George Garcia, parochial vicar ug Msgr. Jaime Gamboa. Gitambungan kini sa nag kadaiyang pribado ug pampublikong sector sa panggamhanan ug simbahan.

Ang tumong ug tuyo sa BISITA PASTORAL mao ang pagkumusta, paghimulso sa pagtoo sa mga parokyano dinhi sa Virgen Dolorosa isip mga katoliko. Ipahigayon usab ang paglantaw sa kahimtang sa parokya aron mahibaloan ang mga best practices kung giunsa pagpalambo ang parokya bisan tuod sa mga pagsulay nga nahiagian sa panahon sa pandemya.

Matod pa ni Archbishop Muloy sa iyang homiliya. “Ang pagbisita mandated kini aron malantaw ang larawan sa usa ka simbahan, ug kumustahon nako ang pagtoo sa katawhan sa mga parokyano pinaagi sa akong pakighinabi sa mga GSL’s, Batan-on, GKK members, Parish Staff, Parish pastoral ug sa mga kaparian dinhi sa parokya, To encourage the faith of the people.”

Dugang pa sa iyang homiliya “kinahanglan lig-onon gyod nato ang pagtoo bisan tood sa mga kasaypanan namo, kaparian ug uban pang myembro sa GKK, hinaot nga dili mag-atras abante aron makapadayon kita sa atong tumong sa kinabuhi pinaagi sa giya sa Ginoo.” DO THIS IN MEMORY OF ME”. Isip mga Kristyano padayon ta nga may direksyon aron molambo atong pagtoo.

Mapasalamaton usab si arsobispo sa colorful and festive welcome sa mga parokyano. “Kini nagtimaan sa buhing pagtoo tungod kay nagkahiusa kamo aron mamahimong magmalapuson ang pagbisita.”

Pagkahuman sa fellowship lunch gisunod dayon ang Kolokokabildo sa mga GSL’s diin malipayon nga gitubag ni Arsobispo Valles ang mga pangutana nga adunay mga pagtulun-an nga makatabang unsa on sa pag lig-on sa pagtoo isip katoliko. Iyang gipahimangno nga isip mga piniyalan ni Kristo , padayon nato ang mga kalihukan nga may tumong aron kita molambo sa Kristohang kinabuhi.

Gitapos ang unang adlaw sa pagbisita pinaagi sa kolokokabildo sa mga batan-on. Nagpahigayon sila ug fast talk with Bishop ug malipayon nga gitubag sa Obispo nga bisan sa hamubong panahon nagmamapuson kini. Uban sa kamaya miduyog ang mahal nga Obispo sa kalipay ug kadasig nga ipadayon sa mga kabatanonan ang pagtoo isip mga piniyalan ni Kristo.

Atol sa ikaduhang adlaw , gipahigayon ang GKK mass sa San Roque Camanlangan, Camudmud, Island Garden City of Samal. Mitambong ang mga GSL’s ug members sa Zone 3-A and 3-B nga gilangkuban sa 9 ka kapilya. Malipayon nga gisugat ang Obispo sa mga katawhan . Dili sayon ang pagsunod kang Kristo, pero kung magkahiusa ang tanan mamahimo kining sayon aron mapadayon ang atong pagtoo isip mga katoliko.

Adunay 34 ka active members sa pagkakaron, ang maong kapilya nga nagsugod niadtong 1944, tungod sa lokasyon niini lisod gyod nga makakuha ug daghan nga myembro pero nagpadayon gihapon sila pinaagi sa nagkahiusang GSL’s and members.

Mapasalamaton ang usa ka members sa GKK sa pag abot ni Obispo kay giayo daw ang kalsada, ug dugang pa niya maayo unta ug magsige ug balik ang Obispo….. basin masemento ang dalan paingon sa kapilya aron modaghan ang magtotoong Katoliko nga moapil sa mga kalihukan sa kapilya.

“Misyon sa kalipay, misyon sa VDP, misyon sa Arkidyosis sa Davao mao ang paghimulso sa kinabuhing pagtoo, ang lig-on nga kapilya, lig-on usab ang pagtoo. Magdungan kita sa panaw sa atong paglawig aron mapalig-on ang atong pagtoo, diha sa kinabuhing Kristyano,” matod pa ni Arsobispo Muloy.

Human sa kalihokan sa GKK, misunod dayon ang pagcheck sa mga libro sa Parokya nga gipangunahan ni Msgr. Paul Cuison ug diin nakita nila nga aduna gayu’y panaghiusa ang mga parokyano alang sa pagpalambo sa, Virgen Dolorosa Parish.

Gikahinabi usab ang mga miyembro sa Pastoral Team nga naglangkob sa mga coordinators sa kada ministriya. Nahisgutan ang mga panghitabo sa pagbisita sulod sa duha ka adlaw. Usa ka miyembro nangutana, “unsa imong napulsohan sa among Parokya?” Gitubag kini ni Archbishop, “wala ako’y laing napulsohan sa Virgen Dolorosa Parish, kondili lig-on ang pagtoo tungod kay ang tanang mga katawhan sa maong Parokya nagkahiusa aron mapalambo ang simbahang Katoliko.”

Mapasalamaton si Rev. Fr. Ricky Peñalosa sa tanang lumilihok aron mahapsay ang kalihokan sa pagbisita. Sama sa gikaingon, “natapos na,” atong ipadayon ang mga kalihokan aron hingpit nga mapalig-on ang pagtoo sa mga parokyano sa kinabuhing Kristyano. (Junelda Jauod | Parish SoCCom)