Pagpalig-on sa pag-alagad

(An excerpt of the homily of the Most Rev. Romulo G. Valles, D.D., on the Day 2nd Day of the Pastoral Visit of at San Lorenzo Ruiz Parish: GKK Christ the King, Kaliraya & Mega Homes, Bago Aplaya, Davao City)

Busa kining Bisita Pastoral labi kanang murag ako ang bida kay bishop pa naman ang mobisita, i-ampo pud tawon ko ninyo. I-ampo ang mga pari kining inyong mga leader, ayaw mog salig nga lig-on kaayo mi kay kung unsa among lihok, unsa among agi para mana ninyo. Kung di mi ampoan ninyo unsaon sab pag-alagad, madamay man mo. Busa moingon ko sama sa Ebanghelyo karon: “Pinangga sa Diyos ang Simbahan, pinangga sa Diyos ang katilingban, pinangga sa Diyos ang Archdiocese, pinangga sa Diyos ang Parokya, pinangga sa Diyos ang GKK.” Niingon ang Diyos sa Ebanghelyo ron: “Kinahanglan ang mga leader maayo.” Ang mga lider maayo, apil pud ang GKK, pero dili mahadlok pud. Kung makulang ta ang kanindot sa atong relihiyon, kay ang Diyos pud bisag grabe siya modemand, grabe siya mangayo kabalo pud siya maluoy. Kapila ta mapukan mobangon ta, naay lider nga ma-discourage pero mobalik ay kanindot! Busa kung madiscourage kita, usahay bation nato dili ta angayan, usahay ako mismo bation nga dili ako angayan. Moingon ako “Ginoo may nahibalo, tabangi ko nga mahimong buotan ug moalagad sa imong katawhan.”

Ang tuyo sa Parokya, ang tuyo sa simbahan, ang tuyo sa Obispo nga mobisita ninyo motan-aw ko kumusta man kinabuhi sa pagtuo sa inyong katilingban? How is your life of faith? Kay mao mana ang misyon sa Parokya, misyon sa simbahan, misyon sa GKK nga matag usa molambo sa iyang kinabuhi. Unya molabo siya sa ingon nga andam siyang mobiya sa mga butang nga kon kalibutan pasultihon daw importante. Mga butang nga importante kay imong ginagunitan, imong kuhaon. Apan diay sa pagsulti labi na sa pagtulun-an sa Simbahan kining mga butanga pwede nimo biyaan ug makaamgo kita nga pipila ra diay ang mga butang nga kinahanglan aron molambo ang atong pagtuo. Mao na ang misyon sa Simbahan nga tabangan nga makaamgo ang katawhan nga ikaw tawo abog raka apan sa tabang sa grasya sa Diyos makabaton ka ug kinabuhing dayon.

Mao ning tuyo sa akong pagbisita dili lamang sa sentro apan gusto ko makabisita gyud ug katilingban aron akong mabati unsa kalig-on ang atong pagtuo. Ug kung medyo bation ninyo nga “Bishop dili lang ko mosinggit, dili lang ko mosiyagit pero huyang kaayo mi.” Nevermind, nia kita aron malig-on, aron kita mobalik sa Ginoo, mosalig sa Ginoo aron ang atong lakang sa kinabuhi, atong damgo sa kinabuhi, atong ambisyon sa kinabuhi dili lang mobaga atong pitaka, maharuhay kita. Apan ang atong ambisyon, ang atong damgo unta kini ang role sa Parokya, kini ang role sa Archdiocese, ang role sa Simbahan nga kanunay sa daghang mga haylo sa kinabuhi, daghang mga kipat-kipat nga malipat ta; ang Simbahan kanunay magpahinumdum nga dili ta ma lose focus nga ang atong destino, mao ang langit, ang atong destino mao ang kinabuhi uban sa Diyos.

Busa ang mga kalihukan sa GKK, kanunay gyud padulong niana pananglitan sa kinabuhi sa pagpanudlo, kining mga Catechists, dungay mga pagpangalagad pananglitan sa mga physical needs, sunog, baha, kay dili lang man ta mangalagad sa kalag apan sa lawas sa tawo. Duna poy mag-alagad sa liturhiya moatiman sa kapilya. Dunay mga pag-alagad aron kining tanan sa buhat sa kalooy, pinaagi sa pagpanudlo, pinaagi sa pag-ampo kitang tanan kada Dominggo, kada adlaw, mabuhi gyud ang atong tumong, ang atong pagtuo nga kitang tanan iya sa Diyos.