Pre-Fiesta Assembly Gipahigayon

Alang sa umaabot nga ika-29 nga kapistahan sa mahal nga patron, St. Joseph The Worker, gipahigayon ang pre-fiesta assembly sa GKK St. Joseph the Worker, Jade Valley, Zone 8 nga nahisakop sa St. Mary of the Perpetual Rosary Parish niadtong Martes sa alas 6:00 sa gabie, Abril 2, 2024. Ang Tema: “San Jose, Piniling Piniyalan sa Ginoo, Patron sa mga Mamumuo, Panag- ingnan sa Kakugi, Salamin sa Diosnong Kalig-on ug Sumbanan sa Hiniusang Panaw sa Pagtoo”.

Gilangkuban kini sa duha ka bahin: Ang unang bahin mao ang Santos nga Misa nga gipangulohan sa Kura Paroko, Rev. Fr. Dionisio C. Tabiliran, diin gipadayag nga isip usa ka PINIYALAN, kita giawhag nga makabaton og kasingkasing nga mapaubsanon ug manggihatagon, maloloy-ong moatiman sa atong mga kaigsoonan nga labing nanginahanglan.

Ang ika-duhang bahin mao ang GKK Assembly meeting diin mapasalamaton ug malipayong gi-abiabi ni PSK Eleonor Burgos ang mga miyembro sa Parish Pastoral Team: Rev. Fr. Dionisio C. Tabiliran, Hermelita Mapute, Parish SoCCom Coordinator ug PSK Arsenia Barimbao, GKK Parish Coordinator, ang pagpresentar sa mga GKK Servant Leaders (GSLs) ug mga Tigpasayon Pundok Banay (TPBs) ug uban pang mga aktibong lumilihok sa GKK. Adunay 62 nga miyembro ang nitambong sa maong asembliya. Misunod ang report sa PSK Eleonor Burgos diin naglangkob sa pagbalik-lantaw sa miaging tuig nga kapistahan: mga kaayuhan ug kalisdanan, report pinansyal, mga plano ug programa sa umaabut nga kapistahan sama sa schedule sa novena, Fiesta Mass ug GKK priorities.

Gipaambit usab sa Parish Pastoral Team ang mga nagpadayon nga mga Archdiocesan ug Parish programs ug activities. Gihangyo sa GKK Parish Coordinator nga suportahan kini. Gihatagan og importansya sa Parish SoCCom Coordinator ang mahitungod sa Roles and Functions sa usa ka GKK SoCCom. Gipasabot sa Kura Paroko ang mahitungod sa pagsaulog sa Diamond Jubille sa Archdiocese of Davao ug mga nakalatid nga mga aktibidades. Dinhi sa Parokya sa St. Mary of the Perpetual Rosary pagahimoon ang pagbisita sa Co-Sugian Home for the Aged karong Abril 6, 2024 sa hapon. Adunay Santos nga Misa, programa ug gift giving nga ipahigayon.

Sa katapusan, malipayon ug mapasalamaton ang mga GSLs, TPBs ug mga miyembro alang sa malampuson ug han-ay nga GKK Pre-Fiesta Assembly. Gitapos kini sa pag-ampo ni PSL Arturo Bag-o. (Godoberta “Bebie” Pecolados, GKK SoCCom)