Lakaw, Dapita ang tanan sa kumbira

Matag tuig ang atong Simbahan nagasaulog sa World Mission Sunday. Ang mensahe sa atong mahal nga Santo Papa Francisco para karong tuiga Oktobre 20, 2024 nag-ingon: “Go and invite everyone to the banquet” (Mt. 22:9). Kinutlo kini gikan sa sambingay sa ebanghelyo ni San Mateo diin ang hari naghikay og usa ka kumbira sa kasal alang sa iyang anak nga lalaki. Apan ang mga giimbita mibalibad sa pagtambong. Busa ang hari nagmando sa iyang mga sulogoon sa pag-adto sa kadalanan ug pagdapit sa tanang matagbuan. Ang pamalandong sa Santo Papa nagdasig kanato sa atong tahas sa ebanghelisasyon sa katawhan ngadto sa “Communion, Participation, Mission” sa atong panaw sa sinodal nga Simbahan ilabi sa atong panahon karon.

Adunay tulo ka mga punto ang Santo Papa sa iyang pamalandong niini. Una, “Go and invite” duha ka mga pulong sa Ginoo “Lakaw kamo ug dapita sila.” Ang misyon nagdasig kanato nga dili kita angayan kapuyon sa pag-adto sa atong mga kaigsoonan ug pagdapit kanila diha sa bangkete sa Ginoo. Si Hesus ang Maayong Magbalantay mismo, iyang gipangita bisan gani ang mga karnero nga nawala. Human sa iyang pagkabanhaw gingnan ni Hesus iyang mga apostoles “Lakaw kamo.” Ang Simbahan nga nagpabiling matinud-anon sa misyon nga iyang nadawat sa Ginoo nagpadayon niining buhat sa paglakaw ug pag-imbita sa tanang katawhan ngadto sa bangkete sa Ginoo pinaagi sa pagpakigsuod, pagsabot ug pagkamaatimanon sama sa paagi sa Ginoo.

Ikaduha, “To the marriage feast.” Kining misyon sa madasigong Simbahan naghulagway ug duha ka dimensyon: padulong sa kasaulogan sa Santos nga Eukaristiya ug padulong ngadto sa Langitnong Bangkete diha sa gingharian sa langit. Kini ang direksyon sa mensahe sa Ebanghelyo karon una moabot ang ika-duhang pagbalik sa Ginoo.

Ikatulo, “Everyone.” Kini nagpasabot kinsa ang angayan imbitahon alang sa Bangkete sa Ginoo. Isip mga sulogoon ug sumusunod ni Kristo diha sa sinodo ug misyonerong Simbahan, ang imbitasyon sa Ginoo para sa tanan ug walay pili.

Ang misyon alang kanatong tanan nagkinahanglan sa atong pasalig, maatimanong pag-alagad diha sa sinodal ug misyonerong Simbahan kinsa nagahalad sa iyang kaugalingon sa pagserbisyo sa Ebanghelyo.