Pagtisok sa Gugma sa Dios sa Atong Kinabuhi

Ika-31 nga Domingo sa Ordinaryong Panahon (Nov. 3, 2024)
Dt 6:2-6 / Ps 18:2-3, 3-4, 47, 51 / Heb 7:23-28 / Mk 12:28-34

Atong nadungog ang pagsaysay sa Ebanghelyo nga diin ang atong Ginoo gipangutana sa magtutudlo sa balaod kon unsa ang labing dakong sugo sa Dios. Ang tubag sa atong Ginoo nga diin kini nakasentro gayod sa Dios – higugmaon ang Dios labaw sa tanan ug ang sunod niini mao nga mahigugma ngadto sa isigkatawo sama sa paghigugma sa kaugalingon. Dugang pa niini, nakamatikod ang atong Ginoo sa tubag sa magtutudlo sa balaod nga adunay pagsabot busa nakaingon ang atong Ginoo nga “siya dili halayo sa gingharian sa Dios.”

Ang pangutana sa usa ka magtutudlo sa balaod nag-imbita usab kanato nga sa makausa pa mamalandong kita kon ang labing mahinungdanon ba nga sugo mao ang atong gibuhat diha sa atong kinabuhi. Kini wala lamang naghulagway nga ang magtutudlo sa balaod gustong mobitik sa atong Ginoo apan nagpakita usab kini sa iyang pagkaabli ngadto sa bag-ong pagtulon-an. Apan, nasayod kita nga ang magtutudlo sa balaod usa ka batid sa balaod nga gihatag sa Dios ngadto sa iyang katawhan pinaagi kang Moises. Ang kalambigitan sa balaod diha sa ilang kinabuhi usa ka dayag nga pagpakita nga sila nakadepende gayod sa balaod nga ilang nasunod.

Gusto sa atong Ginoo nga dili lamang diha kutob sa pagsunod sa litra sa balaod kondili makaabot gayod kita sa atong kaugalingon kon unsa ang kahulogan niini. Atong pangutan-on ang atong kaugalingon, unsa may epekto niining balaod diha sa tagsa-tagsa nato ka kinabuhi? Nakahatag ba kini ug kagaan sa mga palas-onon diha sa matag-adlaw nga pagkinabuhi? O nakapadugang kaha kini sa kabug-at sa panaw diin nakapahago ug nakapaluya kanato?

Dugang pa niini, ang paghigugma sa Dios nga maoy labing mahinungdanon sa tanang sugo nagpadayag nga ang Dios maoy sentro diha sa tanan natong gipangbuhat. Ang atong dakong gugma sa Dios nga dili makita, atong ipasinati pinaagi sa buhat sa gugma sa atong isigkatawo. Kon kining maong gugma sa Dios mousbong diha sa kinahiladman sa matag-usa kanato, makahimo gayod kita sa paghigugma sa mga tawo nga dili sayon higugmaon. Mahisama kita sa kinaiya sa Dios nga bisan sa mga tawo nga nagpasipala kaniya, siya padayon nga nahigugma ngadto kanila. Kita nakatuon sa paglantaw sa uban dili lamang gamit ang atong tawhanon nga mga mata, atong gamiton ang mata nga mahigugmaon sa Dios.

Sa katapusan, pinaagi sa pagkaabli sa atong kaugalingon ngadto sa uban, ug pagpaduol ngadto kanila, kita usab nahimong abli ngadto sa Dios. Ang gugma sa Dios ug gugma sa isigkatawo dili gayod mabulag ug kanunay parehas nga may kalambigitan diha sa atong pagkinabuhi. Ang atong Ginoo wala mag-imbinto ug laing sugo apan pinaagi sa iyang pagpakatawo ug sa tibook misteryo sa iyang kinabuhi kini nagpadayag sa panaghiusa sa gugma sa Dios ug sa isigkatawo, sama sa duha ka bahin sa krus, ang pahigda nagtimaan sa paghigugma ngadto sa atong isigkatawo ug ang patindog nga bahin sa krus mao ang paghigugma sa Dios kanato. Sa kinatibuk-an, diha sa Eukaristiya, ang Ginoo mihatag ug duha ka dagway sa gugma, ang paghatag sa iyang kaugalingon ug ang paghigugma sa matag-usa sama nga siya nahigugma kanato. (Rev. Fr. Soren Abellanosa)