Unsay tumong sa DiTaSCom?

Niadtong Oktubre 20, 2024, sa programang “Tingog sa Magbalantay” didto sa Diyosis sa Tagum anaa si Most Reverend Medil S. Aseo, D.D. inubanan sa duha ka mga pari nga sila si Fr. Joben L. Planteras, Director sa DiTaSCom ug si Fr. Freddie R. Barte nga mao usab ang kanhi nga Pastoral Director ug ang Pastoral Coordinator nga si Ms. Cynthia Masinaring. Sa maong programa, nagpasalamat ang Obispo sa tibuok Diyosis sa bag-ohay lamang nga mga nahuman nga selebrasyon niadtong petsa 11 sa Oktubre nga mao ang ika-44 ka tuig nga kasumaran sa pagka-Diyosis, ika-19 anyos sa kadugayon sa Cathedral, ika-56 nga kasumaran gikan sa pagka-mugna sa Gagmay’ng Kristohanong Katilingban sa Diyosis, ug diha sa (3) tulo ka mga kaparian nga nagsaulog sa ilang ika-25 ka tuig nga kasumaran sa ilang pagka-pari, nga mao sila; Fr. Joedemar J. Gumban, Fr. Joel S. Boco, ug Fr. Randy V. Murillo. Ang pinaka-importante nga selebrasyon sa maong adlaw nga adunay (6) unom ka mga gi-ordinahan sa pagka-diakono.

Ang dagan sa maong programa gihan-ay ni Bishop Medil pinaagi sa mga pipila ka mga pangutana nga maoy nahimung giya sa paghisgut sa topic nga mao ang (DiTaSCom) Diocese of Tagum Social Communications.

Unsa ang katungdanan o kaha’y misyon sa DiTaSCom sa Diyosis sa Tagum? Ang tubag gikan kang Fr. Joben diin nagkanayon siya nga ang pinakatahas gayud sa DiTaSCom mao ang pag-giya sa katawhan kung unsaon pagpakaylap ang maayong balita ngadto sa uban ginamit ang modernong pamaagi. Gipaklaro pa sa maong pari nga dunay tulo ka butang diin maoy buot huptan sa DiTaSCom, kini mao ang synodality, collaboration ug mission.

Unsa man inyong mga plano sa pagka-karon nga importante aron nga mas mulambo pa ang Simbahan? Sa dinhing bahina, gipaambit ni Fr. Joben ang tiunay nga lantaw sa DiTaSCom, ug nabahin kini sa lima ka struktura. Ang una, gitawag kini ug Diocesan Core group diin bahin kini sa diocesan level. Ang ika-duha, mao ang Diocesan Network Council kon diin ang maong commissioning nahitabo niadtong Oktubre 12. Ang ika-tulo, gitawag kini nila’g Local Core Group kon asa sila nagkuha ug mga miyembro diha sa parochial level. Ang ika-upat ug ika-lima, mao ang Local Network Council GKK network Focal Person gilambigitan kini sa mga magtutuo sa GKK level. Matud pa ni Fr. Joben, usa sa damgo gayud sa DiTaSCom mao ang pagmugna ug formation team, nga maoy muadto sa tagsa-tagsa ka mga parokya hangtud sa GKK, aron nga mapangusgan ang paghatag ug pagtudlo sa mga kabatan-unan unsaon paggamit sa social media sa tarung nga pamaagi.

Agig pagtapos, gipa-klaro ni Bishop Medil ug Fr. Joben nga ang DiTaSCom anaa pa gayud sa lebel diin mao pa gayud ang iyang pagsugod, apan sayod sila nga pinaagi sa tabang sa Simbahan ug sa nagka-lainlaing mga apostolado, ilabi na ang mga magtotoo sa maong diyosis, dili ra gayud kaayo halayo nga makuha nila ang ilang gitinguha pinaagi sa tabang sa atong Ginoo ug ilabi na gayud ang pangama sa Espiritu Santo. (Sem. Geon Casangcapan)