Ang kahayag sa Pamilya Luyo sa Dulom nga Kasinati-an

Ang Santos nga Banay ni Jesus, Maria, ug Jose (Dec. 29, 2024)
1 Sm 1:20-22, 24-28 / Ps 84:2-3, 5-6, 9-10 / 1 Jn 3:1-2, 21-24 / Lk 2:41-52

Ang kapistahan sa Santos nga Banay ni Jesus, Maria ug Jose nagpadayag sa kabalaan sa pamilya. Ang pamilya mao ang hulagway sa kahiusahan sa Santissima Trinidad -Amahan, Anak ug Espiritu Santo. Ang ika-duhang Persona sa Santissima Trinidad – ang Anak, nakig-ambit sa atong pagkatawo aron kita nga iyang katawhan makadawat sa kaluwasan nga iyang gisaad sukad sa pagkapukan sa tawo. Ang kaluwasan nga nagagikan sa Dios lamang nahimugso tungod sa pagkahimugso sa Anak sa Dios dinhi sa atong kalibutan. Si Jesucristo ang gitagna sa mga propeta nga moabot sa kalibutan aron sa pagluwas sa katawhan gikan sa kaulipnan sa sala ug paghatag sa kagawasan sa tanan aron mabuhi.

Sa Ebanghelyo si Santa Maria nasákit pag-ayo sa pagkawala sa iyang anak – ang pagkawala ni Jesus nga mao ang labing mahinungdanon sa tanan diha sa iyang kinabuhi ug ang labing bililhon nga butang sa tibuok kalibutan nawagtang sulod sa tulo ka adlaw. Si Santa Maria sama kang Jesucristo nakasinati usab sa kasákit nga masinati sa tanang katawhan, ang epekto sa sala, bisan tuod ug wala siyay sala. Si Jesus daw nawala usab sa Amahan sulod sa tulo ka adlaw sa iyang paglabang sa kasakit ug kamatayon; ug susama sa iyang pagkawala ngadto sa iyang Inahan sulod sa tulo ka adlaw.

Ang Ginoo nagtugot sa mga kasakit nga atong mahiaguman, sama nga ang atong mahal nga Inahan nasakitan sa pagkawala sulod sa tulo ka adlaw sa atong Ginoo, kita makapangutana usab sa atong Ginoo, “Anak ko, nganong gibuhat mo man kini kanamo? Tan-awa ra god, ang imong amahan ug ako nabalaka kaayo sa pagpangita kanimo!” Sa mga panahon nga dili na nato masinati ang presensiya sa Dios, ilabina sa tumang kasákit – sa balatian man o sa spiritohanon nga aspeto. Kini mao ang sagad natong mabungat diha sa atong kaugalingon – nganong gibuhat mo man kini kanako, Ginoo? Ang tubag sa Ginoo diha kanato susama sa iyang tubag sa iyang Inahan “Ngano man nga gipangita ninyo ako? Wala ba kamo masayod nga kinahanglan ania gayod ako sa balay sa akong Amahan?” Sa laktod nga pagkasulti, wala ba kamo masayod nga ang plano sa Amahan alang sa inyong kinabuhi perpekto, apil na niana ang pag-antus nga inyong giagi-an.

Sa katapusan, ang atong kasinati-an sa pag-antus maghatag kanato sa kalig-on sa pagpadayon sa atong kinabuhi. Ang sakit nga kasinatian sa nanglabayng panahon maghatag kanato sa kalig-on ug pagtubo sa atong kaugalingon. Atong kat-onan ang kinaiya sa atong Mahal nga Inahan, tungod kay ang Simbahan nagtawag man kaniya nga lingkoranan sa kalam. Amen. (Rev. Fr. Soren Abellanosa)