Ang Kapistahan Ni Kristong Hari

Malampuson nga gisaulog ang kapistahan ni Kristong Hari niadtong Nobyembre 24, 2024 sa tibuok simbahan ilabina sa Diyosis sa Tagum nga mao ang titular patron.

Ang Parish of Christ the Eucharistic King nagselebrar ang ika-77 nga Parochial Fiesta, ubos sa temang “Panig-ingnan sa katawhang nagalawig sa paglaum,” Ang Santos nga Misa gipangulohan sa Halangdong Obispo, Most Rev. Medil S. Aseo, D.D. kauban ang mga bag-ong diakono. Kini mao usab ang katapusan nga Dominggo sa liturhikanhong tuig.

BACKGROUND

Sa pagsaysay ni Fr. Marlon Pates nga mao ang Vicar for Clergy sa Tagum, kini maong kapistahan giproklamar ni Santo Papa Pope Pius XI sa tuig 1925. Giproklamar niya kini kay sa tuig 1918 bag-o lang nahuman ang unang kalibutanong gubat. Daghan ang nahitabo sama sa nawala nga pagtuo sa Ginoo. Ang epekto niini gusto sa panggamhanan nga mga lideres nga idominar ang kalibutan pinaagi sa pagwala sa pagtuo sa Ginoo. Si Pope Pius XI nakita niya ang importansya nga kinahanglan ang katawhan magbag-o og mubalik diha sa pagsalig og pagdawat nga aduna’y usa lamang nga Hari og Ginoo nga mao si Hesukristo. Kung dili na gani si Kristo ang maghari sa atong kinabuhi sigurado nga di dyud nato maangkon ang kalinaw, panagsinabtanay og mabungahon nga kinabuhi. Usa kini ka pahinumdum sa simbahan nga ang tinuod nga kalinaw ug tinuod nga kalipay maangkon nato kung anaa ang pagdawat sa atong Ginoong Hesus, ug naa ang pagsunod nato Kaniya og dawaton isip Hari sa atong kinabuhi.

Ang maong slebrasyon dili lamang naghatag ug kalipay sa mga katawhan, apan usa usab ka pahinumdom nga ang gamayng buhat sa gugma ug pagtuo makatabang sa dagkong kausaban sa tibuok katilingban.

Hinaot nga ang Iyang paghari magadasig kanato sa pagkinabuhi nga puno sa pagtuo, paglaom, ug gugma!