Ang Pagsunod sa Matuod nga Kahayag sa Kabag-ohan

Epipaniya (January 5, 2025)
Isaiah 60:1-6 / Psalms 72:1-2, 7-8, 10-11, 12-13 / Ephesians 3:2-3a, 5-6 / Matthew 2:1-12

Ang pagsaulog sa Solemnidad sa Epipaniya nagapahinumdom kanato sa dakong kahibulongan sa pagpadyag ni Kristo sa tibuok kalibutan. Kini nga kapistahan dili lamang bahin sa maalamong mga tawo kon mga haring mago ug sa ilang paghalad sa mga gasa, apan usa kini ka panahon sa pagpamalandong kung unsaon pag-abli sa atong kasingkasing aron madawat si Kristo sa atong kinabuhi. Tulo ka mga punto ang atong pagahisgotan:

Unang Punto: Ang kahayag nga nagagiya: Ang mga haring mago misunod sa usa ka bitoon nga naggiya kanila ngadto padulong sa batang Hesus. Kini nga bitoon usa ka simbolo sa kahayag sa Dios nga magapakita sa dalan sa kamatuoran. Sa atong kinabuhi, adunay daghang kahasol ug kasamok nga makapalibog kanato. Ang Epipaniya nagapahinumdom kanato nga ang Dios magpadala kanato og “mga bitoon”—mga tawo, mga panalangin, ug mga kasinatian—aron kita mapaduol diha Kaniya. Ang pangutana mao: Andam ba kitang mosunod niini nga kahayag?

Ikaduhang Punto: Ang mga gasa sa mga mago: Ang gasa nga gihatag sa mga mago adunay dakong kahulogan: Bulawan—nagrepresentar sa pagkahari ni Jesus. Ang atong pagsunod kaniya mao ang pag-ila nga Siya ang Hari sa atong kinabuhi. Insenso—nagpasabot sa pag-ampo ug pagsalig. Ang pag-ampo mao ang atong halad ngadto sa Dios aron kita magapadayon nga mapaduol Kaniya. Mira—nagpahinumdom sa pag-antus ni Kristo alang kanato. Kini nagdasig kanato sa pagbaton og kaisog ug pagpas-an usab sa atong mga krus uban kaniya. Sa atong kinabuhi, unsa man ang atong mahatag o mahlad kang Kristo? Ang atong gugma, pagtuo, ug pagsalig mao ang labing mahinungdanong halad alang sa atong Ginoo.

Ikatulong Punto: Ang bag-ong dalan nga gisunod: Human makakita kang Jesus, ang mga mago miagi sa lain nga dalan. Kini simbolo sa kabag-ohan sa kinabuhi. Ang matag tinuod nga pagkita kang Kristo magdala kanato sa kabag-ohan—pagbiya sa daang pamaagi sa sala ug paglakaw sa dalan sa grasya. Ang pangutana mao: Nabago ba ang atong kinabuhi tungod sa atong pagtuo?

Ang Epipaniya nagdasig kanato sa pag-ila nga ang Dios nagapadayag kanato sa daghang pamaagi. Sama sa mga mago, kinahanglan kita magapadayon sa pagpaningkamot sa pagpangita kaniya. Sa matag adlaw, ang Ginoo nagapakita sa atong kinabuhi—sa pamilya, sa mga kauban sa trabaho, ug bisan sa mga kalisdanan. Apan giunsa usab nato pagpadayag ang atong kaugalingon diha kaniya?

Sa katapusan, ang Epipaniya dili lamang bahin sa pagbiyahe sa mga mago ngadto sa batang Jesus, apan bahin kini sa atong kaugalingong pagbiyahe sa pagsunod sa kahayag sa Dios. Ang pangutana mao, mosunod ba kita sa kahayag, maghalad ba kita sa atong kaugalingon, ug magbag-o ba kita sa dalan nga atong gisubay? (Rev. Fr. Julius Lugay)