Ika-139 nga Kapistahan sa Immaculada Conception Malampusong Gipahigayon uban ang Episcopal Coronation

Uban sa tema nga, “Usa ka Simbahan: Usa ka Misyon uban ni Birheng Maria diha sa Panaw sa Paglaum ug Kaluwasan”, malampusong gisaulog sa parokya sa Immaculada Concepcion sa Baganga, Davao Oriental ang ika-139 nga kapistahan uban sa pagpahigayon sa Episcopal Coronation nga gipangulohan sa Halandong Obispo Abel C. Apigo, D.D.

Sa iyang homiliya, nagpadayag ang Obispo sa iyang pagpasalamat sa mga parokyano sa kanunay nga paghatag og dakong pasidungog sa Mahal nga Birheng Maria isip ilahang patron.

Si Bishop Apigo nag-ingon, “Sa atong kapistahan karon, kini usab usa ka hagit nga dalhon nato kanunay diha sa atoang mga kasingkasing ang presensya sa Dios dinha sa atong mga kinabuhi.”

Agi og pagpasidungog usab sa Mahal nga Inahan isip Immaculada Concepcion, gihimo ang Episcopal Coronation nga mao ang pagkorona sa imahen sa Immaculada Concepcion, ang orihinal nga hulagway niini nga gipasig-uli sa parokya. Kini usa ka timaan sa pagpasidungog sa hataas na nga panaw sa parokya ilabina karong tuiga diin nagsaulog ang diosesis sa ika-40 niini nga jubileo.

Si Bishop Apigo midungag sa pag-ingon, “Let this be remembered forever, that in the Year 2024, Year of Prayer, 139th Fiesta Celebration in the parish of Baganga, on the Feast of the Immaculate Conception, the solemn honor of crowning the image of the Immaculate Conception, the original image of the parish takes place.”

Agi og pagpadayag sa pagtahod ug pagpasalamat sa Mahal nga Inahan, mitambong sa maong kasaulogan ang mga kaparian, mga kamadrehan, mga seminarista, mga anaa sa lokal nga panggamhanan, mga bisita sa nagkalain-laing parokya, mga layko ug mga parokyano.

Uban sa pangama sa Birheng Maria, Immaculada Concepcion, hagit sa mga parokyano nga ipahimugso ang Ginoong Hesukristo sa mga kasingkasing sa katawhan nga mahimamat. Ipadayon ang pagpuyo sa kinabuhing balaan ingon man nga ang ilahang patron, balaan usab isip atong Inahan. (Nicole Basingan Palmera)